بیت بازی سے لطف اٹھائیں

[محمد وارث]

اب اتنے دنوں بعد جو نکلا ہے تو سورج
لائے مری گم گشتہ بصارت بھی کہیں سے

لگتا ہے کہ سچ مچ کہیں موجود ہے دنیا
ہم وہم بھی کرتے ہیں تو کرتے ہیں یقیں سے

(سید مبارک شاہ)

 

[نوید صادق]

یقین کر میں کسی اور کی امانت ہوں
مرے مشام میں اپنی کوئی مہک نہ ملا

شاعر: رحمان حفیظ

 

[شمشاد]

اک شخص مجھی سا تھا کہ وہ تجھ پہ تھا عاشق
وہ اُس کی وفا پیشگی وہ اُس کی جوانی
(میر)

 

[عمر سیف]

یہی تسکین کی صورت ہے تو پھر
چار دن غم کو بھی اپنا دیکھو

 

[شمشاد]

وہ جو اس دل میں امڈی رہتی تھی
وہ خوشی اب کبھی نہیں ہوگی
(احمد فواد)

 

[عمر سیف]

یوں بھی شاید مل سکے ہونے نہ ہونے کا سراغ
اب مسلسل خود کے اندر جھانکتا رہتا ہوں میں

 

[شمشاد]

نیند سے سب کو جو اٹھاتا ہے
سب کو اک روز وہ سلا دے گا
(احمد فواد)

 

[عمر سیف]

آپ کو دیکھ کر دیکھتا رہ گیا
کیا کہوں اور کہنے کو کیا رہ گیا

 

[شمشاد]

اب فقط دیکھنے کا شوق نہیں
بات کرنے کا حوصلہ بھی ہے
(احمد فواد)

 

[عمر سیف]

یہی نہیں کہ زمانے میں آشنا نہ ملا
ستم تو یہ ہے کہ وفاؤں کا بھی صلہ نہ ملا

 

[شمشاد]

اگر رکھی ہے دل میں آگ اتنی
کہیں سے چند آنسو بھی دِلا دے
(احمد فواد)

 

[حجاب]

یہ اچھا ہے آپس کے بھرم نہ ٹوٹنے پائیں۔۔۔۔
کبھی بھی دوستوں کو آزما کر کچھ نہیں ملتا

 

[نوید صادق]

اچھا ہے دل کے ساتھ رہے پاسبانِ عقل
لیکن کبھی کبھی اسے تنہا بھی چھوڑ دے

شاعر: اقبال

 

[شمشاد]

یوں تو لاکھوں حسین صورت ہیں
دل دھڑکتا ہےِصرف تیرے لئے
(احمد فواد)

 

[محمد وارث]

یک جان نہ ہو سکیے، انجان نہ بن سکیے
یوں ٹوٹ گئی دل میں شمشیرِ شناسائی

اس تن کی طرف دیکھو جو قتل گہِ دل ہے
کیا رکھا ہے مقتل میں اے چشمِ تماشائی

(فیض)

 

[شمشاد]

یہ فضا راس نہ آئے گی تمہیں اے ’نجمی‘
یاد گزرے ہوئے لمحات کی تازہ نہ کرو
(کامران نجمی)

 

[امیداورمحبت]

وفائے وعدہ نہیں، وعدہ دگر بھی نہیں

وہ مجھ سے روٹھے ہیں لیکن اس قدر بھی نہیں​

( فیض)

 

[شمشاد]

نہ آنکھ میں کوئی منظر نہ لب پہ کوئی صدا
اتار دل پہ کوئی اسم در نہیں کھلتے

 

[الف عین]

یہ جرم ہے تو کوئی سخت حکمِ شاہی دے
مری وفا کی مججھے عمر بھر سزا ہی دے

ا ع

 

[عمر سیف]

یہاں بھی ہوگئے اغیار انجمن آرا
میں اپنے دل کی بھری محفلوں میں تنہا ہوں