منیر نیازی یہ آنکھ کیوں ہے، یہ ہاتھ کیا ہے

[نوید احمَد]

یہ آنکھ کیوں ہے، یہ ہاتھ کیا ہے
یہ دن ہے کیا چیز، رات کیا ہے

فراقِ خورشید و ماہ کیوں ہے
یہ ان کا اور میرا ساتھ کیا ہے

گماں ہے کیا اس صنم کدے پر
خیالِ مرگ و حیات کیا ہے

فُغاں ہے کس کے لیے دلوں میں
خروشِ دریائے ذات کیا ہے

فلک ہے کیوں قید مستقل میں
زمیں پہ حرفِ نجات کیا ہے

ہے کون کس کے لیے پریشاں
پتہ تو دے اصل بات کیا ہے

ہے لمس کیوں رائیگاں ہمیشہ
فنا میں خوفِ ثبات کیا ہے

منیر اس شہرِ غم زدہ پر
ترا یہ سحرِ نشاط کیا ہے

منیر نیازی​