بہادر شاہ ظفر یاد آتی ہے اُس آئینہ رو کی کمر مجھے - اعلیٰ حضرت بہادر شاہ ظفر

[حسان خان]

یاد آتی ہے اُس آئینہ رو کی کمر مجھے​

کس طرح سے نہ ہووے عدم کا سفر مجھے​

​

کس گلبدن کی یاد مرے دل میں تھی جو رات​

آیا نہ خواب مسندِ کمخواب پر مجھے​

​

نرگس میں سیر چشم ہوں بستانِ دہر میں​

تیری طرح نہیں ہوسِ سیم و زر مجھے​

​

کچھ ہوش میں بھی آنے دے مجھ کو خدا سے ڈر​

اے بے خودی چلی ہے تو لے کر کدھر مجھے​

​

مرتا ہوں دے تو بوسۂ لب کچھ نہ بات پوچھ​

بھاتا نہیں ہے شربتِ قند و شکر مجھے​

​

روزِ وفات کا تو خطر کچھ نہیں مجھے​

اے ہمنشیں ہے پر شبِ ہجراں کا ڈر مجھے​

​

دریا کا پاٹ تختۂ دامن تو بن گیا​

اور اس سے کیا دکھائے گی اے چشمِ تر مجھے​

​

چاکِ قفس سے دیکھ رہا ہوں رخِ چمن​

صیاد ہے نہیں ہوسِ بال و پر مجھے​

​

جلوہ اُسی کا دیر و حرم میں ہے اے ظفر​

آتا نہیں ہے اُس کے سوا کچھ نظر مجھے​

​

(اعلیٰ حضرت بہادر شاہ ظفر)​

 

[مدیحہ گیلانی]

کچھ ہوش میں بھی آنے دے مجھ کو خدا سے ڈر​

اے بے خودی چلی ہے تو لے کر کدھر مجھے
واہ واہ کیا کہنے ! خوبصورت انتخاب ہے بھئی سبھی اشعار لاجواب ہیں ۔
اور مقطع کا تو جواب نہیں ۔۔۔چہ خوب !​