ناسخ ہے مری مستی کو عشقِ ساقیِ کوثر شراب - امام بخش ناسخ

[حسان خان]

ہے مری مستی کو عشقِ ساقیِ کوثر شراب ​

رات دن پیتا ہوں میں بے شیشہ و ساغر شراب​

​

خون آتا ہے نظر صاف اُس تنِ نازک سے یوں​

جس طرح مینائے بلّوری میں ہو احمر شراب​

​

ہے دلِ مجروح کی اُس چشمِ میگوں پر شفا​

کام مرہم کا کرے کیونکر نہ زخموں پر شراب​

​

گرچہ ہوں مے کش پر اے زاہد نہ کر غیبت مری ​

گوشت کھانے سے برادر کے تو ہے بہتر شراب​

​

کانپتے ہیں اہلِ عصیاں دہشتِ تعزیر سے​

رعشہ دار انسان کو کر دیتی ہے اکثر شراب​

​

لذتِ عشرت ہوئی بے تلخ کامی کب حصول​

ذائقے میں دیکھ لو رکھتی ہے تلخی ہر شراب​

​

مے کشی سے زاہدوں کو اس لیے انکار ہے​

تا نہ ان بدباطنوں کے کھول دے جوہر شراب​

​

ہیں جو عالی ہمت اُن کو مے کشی سے عشق ہے​

آدمی کی عرش پروازی کو ہے شہپر شراب​

​

ہوں نجس ہرچند لیکن پاک کر دے گا وہی​

جس کی نزدیکی سے ناسخ ہوتی ہے اطہر شراب​

​

(امام بخش ناسخ)​

× ایک نسخے میں دوسرے شعر کا مصرعِ اول یوں درج ہے:
خوں نظر آتا ہے صاف اُس کے تنِ نازک سے یوں