ناسخ کیوں نہ خاموشی خوش آوے بلبلِ تصویر کی - امام بخش ناسخ

[حسان خان]

کیوں نہ خاموشی خوش آوے بلبلِ تصویر کی​

لطف کیا میری طرح گر آہِ بے تاثیر کی​

​

عاشقوں سے ہے کڑی بات اُس بتِ بے پیر کی​

کاکلِ پیچاں سے آتی ہے صدا زنجیر کی​

​

جوئے خوں جاری کرے خواہش ہے یہ تقدیر کی​

کوہکن کیوں تو نے جوئے شِیر کی تدبیر کی​

​

بہرِ روزی ہے عبث گردش جوان و پیر کی​

کس نے طفلی میں بھلا تدبیر کی تھی شِیر کی​

​

دم میں تیرے پنجۂ سیمیں کو زریں کر دیا​

اب حنا کے سامنے ہے خاک قدر اکسیر کی​

​

تو نے پائی زلفِ مشکیں شمع نے پایا دھواں​

تجھ کو ہے مقراض کی حاجت اُسے گلگیر کی​

​

پیشتر آنے سے باہر جاؤں مارے شوق کے​

روزِ وعدہ اس لیے آنے میں کچھ تاخیر کی​

​

اس قدر جوشِ جنوں نے مجھ کو لاغر کر دیا​

ہتکڑی کے بدلے کافی ہے کڑی زنجیر کی​

​

کر دیا غم نے لہو پی پی کے اس درجہ سپید​

سادے کاغذ میں شباہت ہے مری تصویر کی​

​

خواب اس غفلت کدے میں اب جو آتے ہیں نظر​

فکر کرنی ہے لحد میں ایک دن تعبیر کی​

​

آج بارے جا پڑی تیری نگہ، پائی مراد​

آرزو مدت سے تھی قوسِ قزح کو تیر کی​

​

لگ چلے گلشن میں گر اُس سروِ سیم اندام سے​

ہو چمک موجِ ہوا میں نقرئی زنجیر کی​

​

خاکِ راہِ یار جیتے جی ملے ممکن نہیں​

خاک میں مجھ کو ملا دے گی ہوس اکسیر کی​

​

تیرے ابروئے خمیدہ سے کہاں او نوجواں​

جھک گئی ہے کہنہ ہونے سے کمر شمشیر کی​

​

گر چھڑانا ہے تجھے پھاہا ہمارے داغ کا​

پہلے کر لے فکر اے جراح آتش گیر کی​

​

سوزِ غم سے اس قدر جلتا ہوں میں ہنگامِ قتل​

پڑ گئے چھالے، جلی خوں سے زباں شمشیر کی​

​

طاقِ ابروئے صنم جس دم نظر آیا مجھے​

ایک مسجد بس وہیں راہِ خدا تعمیر کی​

​

دانت تیرے دیکھتے ہی ہو گیا ناسخ شہید​

ہائے کیا ان موتیوں میں آب ہے شمشیر کی​

​

(امام بخش ناسخ)​

 

[طارق شاہ]

بہرِ روزی، ہے عبث گردِش جوان و پیر کی !​

کِس نے طِفلی میں بَھلا تدبِیر کی تھی شِیر کی​

​

​

پیشتر آنے سے، باہر جاؤں مارے شوق کے!​

روزِ وعدہ اِس لیے آنے میں کچھ تاخیر کی​

​

​

کیا کہنے!​

​

شکّرشیئرکرنےپر ، بہت خوش رہیں​