جوش کہاں تک؟ - جوش ملیح آبادی

[حسان خان]

آشفتہ سری اے دلِ ناکام کہاں تک؟​

یہ شکوۂ بے مہریِ ایام کہاں تک؟​

​

دارائیِ اسلاف پہ تا چند یہ ماتم؟​

انجامِ تنعّم پہ یہ کہرام کہاں تک؟​

​

اِس دغدغۂ گردشِ افلاک سے حاصل؟​

یہ وسوسۂ فتنۂ ایام کہاں تک؟​

​

پروانہ صفت جھونک بھی دے آگ میں خود کو​

آغاز میں اندیشۂ انجام کہاں تک؟​

​

اے رہبرِ گمراہ! یہ غداریاں تا چند؟​

او ننگِ زمانہ! ہوسِ نام کہاں تک؟​

​

اٹھ رعد کے آغوش میں ہے نغمۂ شیریں​

یہ سازِ طرب کی ہوسِ خام کہاں تک؟​

​

آ صرصر و سیلاب میں ہے روحِ شبستاں​

یہ ذوقِ شبِ ماہ و لبِ جام کہاں تک؟​

​

جو دوڑ میں پیچھے تھے بہت بڑھ گئے آگے​

اے پائے طلب! رشتۂ اوہام کہاں تک؟​

​

گردوں پہ حریفوں نے بنائے ہیں نشیمن​

اے پست نظر! سیرِ لبِ بام کہاں تک؟​

​

ہمت ہے تو مطلوب سے خود کیوں نہیں ملتا​

یہ سلسلۂ نامہ و پیغام کہاں تک؟​

​

ہاں دیکھ حریفوں کے چھلکتے ہوئے ساغر​

اے تشنہ دہاں! دُردِ تہِ جام کہاں تک؟​

​

کیوں قوتِ پرواز پر ایماں نہیں لاتا​

اے مرغِ قفس! نالہ تہِ دام کہاں تک؟​

​

خود خوشۂ انگور نچوڑا نہیں جاتا​

اغیار سے دریوزۂ یک جام کہاں تک؟​

​

ہاں خود و زِرہ بھی تو ہے اسلام کا زیور​

پہنے گا فقط جامۂ احرام کہاں تک؟​

​

(جوش ملیح آبادی)​

۱۹۲۳ء​