سلیم کوثر کُچھ کشش دل بَروں میں ہے ہی نہیں ۔۔۔۔۔۔۔۔۔۔۔۔۔۔۔۔۔۔۔۔سلیم کوثر

کُچھ کشش دل بَروں میں ہے ہی نہیں​
رنگ وہ محفلوں میں ہے ہی نہیں​
ہر طرف تیری رُونمُائی ہے​
اور کچھ آئنیوں میں ہے ہی نہیں​
جو تُجھے مُنفرد بناتی ہے​
بات وہ دُوسروں میں ہے ہی نہیں​
میرا کتنا خیال ہے اُس کو​
جو مرے دوستوں میں ہے ہی نہیں​
سب کے سب سلسلے اُسی کے ہیں​
جو مرے سلسلوں میں ہے ہی نہیں​
وہ مرے رابطوں میں رہتا ہے​
جو مرے رابطوں میں ہے ہی نہیں​
ہاں وہی تو ہے مسئلہ میرا​
جو مرے مسئلوں میں ہے ہی نہیں​
جس کنارے ہمیں اُترنا ہے​
وہ ترے ساحلوں میں ہے ہی نہیں​
ہم جسے اپنا کہہ سکیں کھُل کر​
کوئی اپنی صفوں میں ہے ہی نہیں​
کیا کُشادہ دلی کی بات کریں​
اب تو آنگن گھروں میں ہے ہی نہیں​
کٹ گئے پیڑ ،اُڑ گئے طائر​
کوئی نامہ بَروں میں ہے ہی نہیں​
تُجھ سے ملنے کا کیا کوئی امکان​
آنے والے دِنوں میں ہے ہی نہیں​
جو مُسافر کا کچھ پتہ دیتی​
گرد وہ راستوں میں ہے ہی نہیں​
سیدھا رستہ ہے عشق کی منزل​
یہ سفر دائروں میں ہے ہی نہیں​
جس کی تسبیح لوگ پڑھتے تھے​
نام وہ تذکروں میں ہے ہی نہیں​

جس سے چہروں پہ نُور رہتا ہے​
وہ اُجالا دِلوں میں ہے ہی نہیں​
جس سے روشن تھے منبر و محراب​
وہ دِیا طاقچوں میں ہے ہی نہیں​
رقص کرتا ہے جوسرِ مقتل​
وہ لہو تو رَگوں میں ہے ہی نہیں​
سب کے شانوں پر سَر سلامت ہیں​
کوئی سودا سَروں میں ہے ہی نہیں​
اُس کا احسان مند ہوں میں سلیم​
جو مرے مُحسنوں میں ہے ہی نہیں​
سلیم کوثر​
 
Top