کوکب آفندی :::: تُجھے ڈُھونڈ لے جو وہی کامراں ہے

[طارق شاہ]

غزلِ​

مرزا کوکب آفندی​

​

تُجھے ڈُھونڈ لے جو وہی کامراں ہے ​

اِک آواز چُپکے سے دے دے کہاں ہے ​

​

زمیں ہے وہاں اور نہ یہ آسماں ہے ​

جہاں تُو ہی تُو ہے وہی لامکاں ہے ​

​

تمنّاؤں اور حسرتوں میں رواں ہے ​

یہ عمرِ دو روزہ بھی اِک کارواں ہے​

​

سمجھنا نہ، صیّاد یہ آسماں ہے ​

نشیمن جو پھُونکا ہے اُس کا دھواں ہے ​

​

اُجاڑا ہے گھر اپنا جوشِ جنوُں میں ​

جو تھا رشکِ جنّت، وہ ہُو کا مکاں ہے ​

​

تِرے عِشق میں محویّت کا یہ عالم !​

قفس کو ہی سمجھے کہ یہ آشیاں ہے ​

​

کہو تو سُنادوں یہ ہے روزِ محشر ​

تُمھاری جفاؤں کی جو داستاں ہے ​

​

سُنیں گے وہ کیا دردِ دل کا فسانہ ​

جنہیں آہ کرنا بھی میرا گِراں ہے ​

​

ہمِیں ایک بدلے ہیں اُلفت کے مارے ​

زمِیں ہے وہی اور وہی آسماں ہے ​

​

جُنونِ محبّت نے دُنیا بدل دی ​

اب اُن کی زباں پر مِری داستاں ہے ​

​

بُڑھاپے میں کوکب کے انداز دیکھے !​

جوانی کے تیور ہیں، اب تک جواں ہیں​

​

* مرزا کوکب آفندی ​

​

* پورا نام : سلیماں مرزا کوکب آفندی اکبرآبادی​

جناب بزم آفندی صاحب کے صاحبزادے اور جناب نجم آفندی صاحب کے برادرِخُرد تھے​

مجموعہ کلام : "چراغ بزم کا ہُوں"​

​