نظیر چڑیوں کی تسبیح

[سید شہزاد ناصر]

چڑیوں کی تسبیح​

(و ان من شئی الا یسبح بحمدہ و لکن لا یفقھون تسبیحھم)​

وقت سحر کو روحیں کیا کیا ہوں ہوں کرتی ہیں​

ہوں ہوں ہوں ہوں کر کر ذکر کن اور فیکوں کرتی ہیں​

مرغے بولیں ککڑوں ککڑوں مرغیاں کوں کوں کرتی ہیں​

طوطیاں بھی سب یاد میں اس کی بھوں بھوں کرتی ہیں​

سانجھ سویرے چڑیاں مل کرچوں چوں چوں چوں کرتی ہیں​

چوں چوں چوں چوں کیا؟ سب بیچوں بیچوں کرتی ہیں​

پنکھ بڑھا گڑھ پنکھ اسی کے غم کو تپ میں تپتے ہیں​

عنقا اور سیمرغ اسی کی فرقت کے بیچ تڑپتے ہیں​

سارس گدھ حواصل بزے بگلے پنکھ کلپتے ہیں​

پنکھ پکھیرو جتنے ہیں سب نام اسی کا جپتے ہیں​

سانجھ سویرے چڑیاں مل کرچوں چوں چوں چوں کرتی ہیں​

چوں چوں چوں چوں کیا؟ سب بیچوں بیچوں کرتی ہیں​

قمری بولے حق سرہ بلبل بولے بسم اللہ​

کبک ٹیٹری چاروں قل،اور تیتر بھی سبحان اللہ​

دادر مور پپیہے ، کوئل کوک رہے ہیں اللہ اللہ​

فاختہ کو کو تیہو، ہو ہو، طوطے بولیں، حق اللہ​

سانجھ سویرے چڑیاں مل کرچوں چوں چوں چوں کرتی ہیں​

چوں چوں چوں چوں کیا؟ سب بیچوں بیچوں کرتی ہیں​

شکرا چیخ اور لگھڑ باشے، اور ترمتی، باز کوئی​

کونج، کبوتر، سبزک، جھانپو، کلکل، سارو، مار چوئی​

لعل پڑھے صم بکم جس پہنے پوشاک سوئی​

پدڑی، پدی، پودنے شکر خورے بولیں توئی توئی​

سانجھ سویرے چڑیاں مل کرچوں چوں چوں چوں کرتی ہیں​

چوں چوں چوں چوں کیا؟ سب بیچوں بیچوں کرتی ہیں​

چیل کطی السجل کہے ہے، چلوں چلوں، مت جان میاں​

کوے قاں قاں کرتے ہیں الآں کم کان میاں​

مر مر بولے مرغابی کل من علیہا فان میاں​

جتنے پنکھ پکیرو ہین سب پڑھتے ہیں قران میاں​

سانجھ سویرے چڑیاں مل کرچوں چوں چوں چوں کرتی ہیں​

چوں چوں چوں چوں کیا؟ سب بیچوں بیچوں کرتی ہیں​

ہنس، ہما، سرخاب،تدرویں بولیں یا رحمٰن، میاں​

سارو، ہریل،اور لٹورے،دھیڑیا حنان ،میاں​

قفنس، تیتر،چکوہ، چکوی بولیں یا منان، میاں​

ہد ہد بولیں احد احد کچھ تو بھی تو کر دھیان میاں​

سانجھ سویرے چڑیاں مل کرچوں چوں چوں چوں کرتی ہیں​

چوں چوں چوں چوں کیا؟ سب بیچوں بیچوں کرتی ہیں​

بوم چغد اور سبزک ابابیل اورچکوریں شام چڑی​

کنجھن ،جھپاں،لوے، کلنگ اور غوغائی کی دھوم پڑی​

تتلی ، ٹڈی، ڈانس بھنبھیری، کتری بھنوری اور پڑی​

مکھی، مچھر، بھنگے بول رہے ہیں سب گھڑی گھڑی​

سانجھ سویرے چڑیاں مل کرچوں چوں چوں چوں کرتی ہیں​

چوں چوں چوں چوں کیا سب بیچوں بیچوں کرتی ہیں​

تن تن، اور لم ڈھیک، ممولا حق حق تار پروتے ہیں​

اگن، بئے، چنڈول، ابلقے یاد میں اس کی روتے ہیں​

طائر تو سب تخم محبت اس کا دل میں بوتے ہیں​

پنچھی اس کی یاد کریں، ہم پاؤں پسارے سوتے ہیں​

سانجھ سویرے چڑیاں مل کرچوں چوں چوں چوں کرتی ہیں​

چوں چوں چوں چوں کیا؟ سب بیچوں بیچوں کرتی ہیں​

کس کس کا نام لوں غرض، ہیں جتنے طائر خورد و کبیر​

کوئی کہے یا حئی توانا، کوئی کہے، یا ربِ قدیر​

پنکھی تو سب یاد کریں، اور ہم غفلت میں رہیں اسیر​

ہم سا غافل اب دنیا میں کوئی نہ ہو گا آہ! نزیر​

سانجھ سویرے چڑیاں مل کرچوں چوں چوں چوں کرتی ہیں​

چوں چوں چوں چوں کیا؟ سب بیچوں بیچوں کرتی ہیں​