چلا ہوں میں بچشمِ تر مدینہ میری منزل ہے قمر الزماں قمر اعظمی

[سیما علی]

چلا ہوں میں بچشمِ تر مدینہ میری منزل ہے
لٹاتا رشک کے گوہر مدینہ میری منزل ہے
مدینہ رشکِ جنت ہے نگاہِ مردِ مومن میں
ہر اک گوشہ سکوں پرور مدینہ میری منزل ہے
ہزاروں کہکشاں قربان طیبہ تیری گلیوں پر
جھکے ہیں ماہ اور اختر مدینہ میری منزل ہے
شکستہ پا سہی لیکن رہے گا میری منزل تک
مرا شوقِ سفر رہبر مدینہ میری منزل ہے
وہ لمحہ ہوگا جانِ زندگی جب سامنے ہوگا
نبی کا روضۂِ انور مدینہ میری منزل ہے
ہے جانِ آرزو طیبہ وہاں آرام فرما ہیں
میرے آقا مرے سرور مدینہ میری منزل ہے

تھکن زنجیر پا ہونے کو ہے ہر گام پر لیکن
نہ رکنا اے دلِ مضطر مدینہ میری منزل ہے
ملے گا اذن ہم کو بھی کہ ہیں وہ پوری امت پر
کرم فرما کرم گستر مدینہ میری منزل ہے
میرا احساس وارفتہ تمھارے سبز گنبد پر
ہوا قرباں نظر بن کر مدینہ میری منزل ہے
نکل آیا فریبِ زندگانی کے مناظر سے
کہ اب ہے ایک ہی منظر مدینہ میری منزل ہے

جبینِ شوق لذت یابِ سنگِ در ہے مدت سے
نہ چھوٹے اب تمھارا در مدینہ میری منزل ہے
قمرؔ دل چاہتا ہے اڑکے جاپہنچوں مدینے میں
کہاں سے لائوں بال وپَر مدینہ میری منزل ہے
*****