پہنچے جو مثلِ ابر ہم آنسو بھرے ہوئے - تعشق لکھنوی

[حسان خان]

پہنچے جو مثلِ ابر ہم آنسو بھرے ہوئے​

برسوں سے تھے جو خشک بیاباں ہرے ہوئے​

​

آنسو بھر آئے دیکھ کے بادل بھرے ہوئے​

صحرا کے ساتھ زخم جگر کے ہرے ہوئے​

​

خالی ہوئے جو آنکھوں کے بادل بھرے ہوئے​

گلزار و کوہ و شہر و بیاباں ہرے ہوئے​

​

خوفِ شبِ فراق سے تھرا رہا ہے دل​

دامن میں طفلِ اشک چھپے ہیں ڈرے ہوئے​

​

وہ نخل خشک تھے نہ مبارک ہوئی بہار​

بجلی گری فلک سے ذرا جب ہرے ہوئے​

​

اٹھتے ہیں امتحان کو بادل بہار کے​

ہم بھی بہت دنوں سے ہیں اے دل بھرے ہوئے​

​

چمکی جو جوش میں ترے وحشی کی برقِ آہ​

بیٹھے ہیں آشیانوں میں طائر ڈرے ہوئے​

​

کھینچو نہ میرے سینے سے اے قاتلِ جہاں​

تم کیا کرو گے تیر لہو میں بھرے ہوئے​

​

بیتاب ہے پئے سرِ شوریدہ تیغِ یار​

لڑکوں کے دامنوں میں ہیں پتھر بھرے ہوئے​

​

وحشت سرائے دہر میں آیا نہ پھر کوئی​

ایسے گئے یہاں سے مسافر ڈرے ہوئے​

​

آنکھیں ہیں اپنی عالمِ غربت میں سدِ راہ​

ہیں ہر قدم پہ اشک کے دریا بھرے ہوئے​

​

نالے میں کیا کروں شبِ تاریکِ ہجر میں​

چپکے ہیں آج مرغِ سحر تک ڈرے ہوئے​

​

جھنجھلا کے باغباں نے مجھے ذبح تو کیا​

اب رو رہا ہے منہ کو قفس پر دھرے ہوئے​

​

اللہ رے پاسِ الفتِ پروانہ بعدِ مرگ​

روتی ہے شمع سامنے لاشہ دھرے ہوئے​

​

(تعشق لکھنوی)​

 

[مدیحہ گیلانی]

وحشت سرائے دہر میں آیا نہ پھر کوئی
ایسے گئے یہاں سے مسافر ڈرے ہوئے
خوب ہے ۔۔۔!