جوش پھر چرخ زن ہے شیب پہ دورِ جواں کی یاد - جوش ملیح آبادی

[حسان خان]

پھر چرخ زن ہے شیب پہ دورِ جواں کی یاد ​

کاخِ حرم پہ چھائی ہے کوئے بتاں کی یاد​

​

بھیگی تھیں زمزموں کی مسیں جس کی چھاؤں میں​

رہ رہ کر آ رہی ہے پھر اُس گلستاں کی یاد​

​

پھر آئی ہے شباب کی رم جھم لیے ہوئے​

شب ہائے ابر و باد کے خوابِ گراں کی یاد​

​

اللہ، پھر حیات کے گہرے سکوت پر​

منڈلا رہی ہے نغمۂ آبِ رواں کی یاد​

​

افشانِ مہ وشاں پہ جو لیتی تھیں کروٹیں​

نظریں اٹھا رہی ہے پھر اُس کہکشاں کی یاد​

​

راتیں۔۔ انگیٹھیوں پہ سناتی تھیں کل جسے​

سینے میں چبھ رہی ہے پھر اُس داستاں کی یاد​

​

پھر بے نوا حیات کے ویران دوش پر​

بل کھا رہی ہے گیسوئے عنبر فشاں کی یاد​

​

پھر کھٹکھٹا رہی ہے درِ محبسِ وجود​

آزادیِ نگاہ و خیال و زباں کی یاد​

​

رکھتی تھی رتجگوں کے پپوٹوں پہ جو قدم​

گونجی ہوئی ہے کان میں پھر اُس اذاں کی یاد​

​

پھر ریگزارِ سندھ کی تپتی زمین پر​

گنگا کو لے کر آئی ہے ہندوستاں کی یاد​

​

غلطاں ہے پھر خمار کی بے کیفیوں میں جوش​

دورِ سخائے حضرتِ پیرِ مغاں کی یاد​

​

(جوش ملیح آبادی)​

 

[مدیحہ گیلانی]

واہ ۔۔۔جوش کی قادرکلامی کے تو کیا ہی کہنے حسان میاں !
آپ کے انتخاب کا بھی جواب نہیں بھئی ۔۔جیتے رہیں بیٹا