تو اتنی جلدی بھی نہ اتریں کہ خود صیاد حیرت میں پڑ جائے
شاید کبھی پہلے بھی عرض کیا تھا کہ سماجی رابطے کے فورمز اور ویب سائٹس پر عموماََ سستی شہرت اور فوری توجہ کے حصول کیلئے دو تین طرح کے حربے استعمال کئے جاتے ہیں ۔ منافرت پر مبنی، دل آزاری سے لبریز ، لوگوں کی تحقیر سے پُر گفتگو کرنا ، جس کا فوری جواب عموماََ آجاتا ہے اور حاملِ تحریر کو منفی ہی سہی شہرت مل جاتی ہے۔ یا زمانے سے نرالی کہنے کا خبط ، اجتماعی شعور انسانی کو مضحکہ خیز قرار دینے کا شوق، اور اپنی ڈیڑھ اینٹ کی مسجد بنانے کا ڈھونگ بھی وہ طریقہ ہے جس سے اچھی یا بُری کی بحث سے آزاد فوری شہرت کا حصول ممکن ہوسکتا ہے۔ طے شدہ مباحث ، مستحکم امور، اجماعی معاملات کی از سر نو بھونڈی تحقیق بھی ایسا ہی ایک زریعہ ہے جس سے مذکورہ بالا خواہشات کی تکمیل کی جاتی ہے ۔ اضافی اس میں یہ ہے کہ لوگوں میں اختلاف بڑھتا ہے خیالات کی دھکم پیل میں الفاظ قابو سے باہر ہوتے ہیں اور رائے کی مخالفت ذات کی دشمنی پر پہنچ جاتی ہے۔
اب ان معاملات پر آپ دوستوں سے اور کیا کہوں۔ جن لوگوں کے جیوں میں ٹیڑھ ہے ان سے واسطہ نہیں مگر جب
ظہیر عباس ورک اور
راحیل فاروق جیسے سلجھے ہوئے نوجوانوں کو اس مٰیں الجھتا دیکھتا ہوں تو جی کڑھتا ہے(1) ۔ انسانوں کی تقسیم بھی عجیب معاملہ ہے ۔ جب بل کلنٹن ہندوستان آیا اور آگرے میں تاج محل کی خوبصورتی سے متاثر ہو کر اس نے انسانوں کو دو حصوں میں تقسیم کیا ، یعنی ایک وہ جنہوں نے تاج محل دیکھا ہے اور ایک وہ جنہوں نے تاج محل نہیں دیکھا۔
کچھ لوگ انسانوں کو بھی بھیڑ بکریوں کی طرح علاقائی اور نسلی طور سے تقسیم سمجھتے ہیں ۔ یعنی پہاڑی بکری علیحدہ ہے، بڑے کان والی الگ، چھوٹے قد کی بکری جدا۔۔ الغرض ان کی تقسیم خالص ان چیزوں پر ہے جس پر بیچاری بکری کا کوئی اختیار نہیں، ویسے بھی جانور تو ہوتے ہی بے اختیار ہیں ۔ انسان کی یہ تفریق ممکن نہیں ہے انسان اپنے نظریے اپنی فکر اور اپنے طرزِ عمل سے منقسم ہے ۔
زمین پر لکیروں کی مدد سے کچھ خانے بنائیں اور ان کے کچھ نام رکھ دیں پھر اپنی جھولی میں چند پتھر ، کوئلے ،گوبر، پلاسٹ، سبزی، لوہے، سونا ، چاندی کے ٹکرے رکھ کر اچھال دیں ۔ سونا جس خانے میں بھی گرے سونا ہی ہوگا، چاندی چاندی ہی رہے گی، گوبر ہر خانے میں گوبر ہی رہے گا۔ یہی مثال انسانوں کی ہے ۔ نیک دل ، منکسرالمزاج، بلند اخلاق، اعلیٰ دماغ کے لوگ ، انسانوں کی ایک قسم ہے ، یہ کہیں بھی پیدا ہوں کسی ملک میں رہیں ، کسی شہر میں پلیں بڑھیں ، کوئی بھی زبان بولتے ہوں یہ ایک ہی جماعت ہیں۔ سادہ لو، عوامی مزاج ، عمومی عقل سمجھ کی ایک اور جماعت ہے یہ بھی ہر قریہء زمین پر مل جاتی ہے۔ اسی طرح کئی قسمیں ہیں اچھوں کی بھی بُروں کی بھی ۔ اچھائی یا بُرائی، بدی اور بھلائی کبھی خطہء زمین سے متعلق نہیں ہوتیں بلکہ سوچ ، فکر اور رجحان سے علاقہ رکھتی ہیں ۔
اس تمہیدی بات کے بعد اپنی بات پر آتا ہوں، مجھے اس دھاگے کے عنوان سے متعلق گفتگو مقصود نہیں ، بلکہ اپنے دوستوں کی گفتگو میں پڑ جانے والی ایک گرہ پر بات کرنی ہے ۔
حاشیہ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(1) ۔ ظہیر عباس ورک اور راحیل فاروق کا نام تمثیل ہے ۔ ایسا نہیں ہے کہ جن دوستوں کا نام مذکور نہیں انہیں میں نوجوان نہیں سمجھتا
، باقی تمام افراد بھی انتہائی قابلِ احترام اور سلجھے ہوئے ہیں ۔ (
راحیل فاروق بھائی سے، نوجوانوں میں شامل کرنے کی بابت اضافی تائید کو خواہاں ہوں )
