ذوق پابند جوں دخاں ہیں پریشانیوں میں ہم ۔ استاد ابراہیم ذوق

[فرخ منظور]

پابند جوں دخاں ہیں پریشانیوں میں ہم​

یارب ہیں کس کی زلف کے زندانیوں میں ہم​

​

ہوتی نہ یادِ زلف تو خطِ شکستہ میں​

لکھتے الف خطوں کی نہ پیشانیوں میں ہم​

​

زنجیر میں بھی نالۂ زنجیر کی طرح​

جوشِ جنوں میں رہتے ہیں جولانیوں میں ہم​

​

پائی نہ تیغِ عشق سے ہم نے کبھی پناہ​

قربِ حرم میں بھی ہیں تو قربانیوں میں ہم​

​

دوزخ بھی جائے نعرۂ ہلِ من مزید بھول​

لائیں جو آہ کو شرر افشانیوں میں ہم​

​

پاکوبیوں کو مژدہ ہو زنداں کو ہو نوید​

پھر ہیں جنوں کی سلسلۂ جنبانیوں میں ہم​

​

مطلب سے اپنے کون ہے آگاہ جُز خدا​

جوں خطِؑ سر نوشت ہیں پیشانیوں میں ہم​

​

ہیں آئنہ میں صورتِ تصویر آئنہ​

آئنہ رُو کے سامنے حیرانیوں میں ہم​

​

ہو وہ عزیز سورۂ یوسف سے بھی جدا​

رکھ دیں تری شبیہ جو کنعانیوں میں ہم​

​

کیا جانیں ہم زمانہ کو حادث ہے یا قدیم​

کچھ ہو بلا سے اپنی کہ ہیں فانیوں میں ہم​

​

کیوں جی کے ہجر میں ہوئے شرمندہ یار سے​

اب مر رہے ہیں اس کی پشیمانیوں میں ہم​

​

سینہ کا چاک سینے کی فرصت کہاں کے ہیں​

مصروف زخمِ دل کی مگس رانیوں میں ہم​

​

جا سکتے ضعف سے نہیں کوچے میں اس کے ذوق​

بہ جائیں کاش گریہ کی طغیانیوں میں ہم​

​

(استاد شیخ ابراہیم ذوق)​

​

 

[غزل قاضی]

کیوں جی کے ہجر میں ہوئے شرمندہ یار سے​

اب مر رہے ہیں اس کی پشیمانیوں میں ہم​

سینہ کا چاک سینے کی فرصت کہاں کے ہیں​

مصروف زخمِ دل کی مگس رانیوں میں ہم​

جا سکتے ضعف سے نہیں کوچے میں اس کے ذوق​

بہ جائیں کاش گریہ کی طغیانیوں میں ہم​

واہ واہ ، لاجواب اور بہت ہی عمدہ کلام فرخ صاحب !

 

[نایاب]

بہت خوب شراکت

ہوتی نہ یادِ زلف تو خطِ شکستہ میں​

لکھتے الف خطوں کی نہ پیشانیوں میں ہم​

واہہہہہہہہہہہ

 

[فرخ منظور]

بہت شکریہ غزل جی اور نایاب صاحب!