نظم - تاریخِ اردو زباں

[ارشد رشید]

تاریخِ اُردُو زباں
======================
عجب نشہ ہے یہ اُردو کہ جو اُترتا نہیں
کہ پیاس بُجھ بھی گئی ہو، تو دل تو بھرتا نہیں
ہے اک خُمار، جو قلب و نظر پہ چھایا ہے
کہ جیسے ذائقہ وہ ہو کہ جو بِسرتا نہیں
دلوں کے شوق کی، جذبوں کی جس سے یاری ہے
وہی تو دوستو اردو زباں ہماری ہے
ٌ
کوئی یہ کہتا ہے پنجاب نے نکھارا اِسے
ہے اک خیال کہ دکن ہی نے سنوارا اِسے
کسی کو سندھ میں اِس کا وطن دکھائی دے
کسی نے بولی کھڑی کہہ کہ ہے پُکارا اِسے
سو اک جہان کی پھر جس سے رشتہ داری ہے
وہی تو دوستو اردو زباں ہماری ہے
ٌ
ہے اک خیال تو یہ بھی کہ لشکری ہے زباں
جو مل گئیں کئی افواج تو بنی یہ وہاں
کوئی ملائے ہے تانے پھر اِس کے ہندی سے
کوئی کہے کہ بنایا اِسے عرب نے میاں
یہ سچ ہے جس کی کہانی بڑی نیاری ہے
وہی تو دوستو اردو زباں ہماری ہے
ٌ
تو بات یہ اِسی تاریخ سے ہوئی ہے عیاں
کہ ہند کی ہی زبانوں میں یہ رہی تھی نہاں
پھر آ ملیں عَرَبی فارسی بھی اس میں کہیں
تو بن گئی یہی اردو زباں، جو اب ہے یہاں
سو جتنی میری ہے اتنی ہی وہ تمھاری ہے
وہی تو دوستو اردو زباں ہماری ہے
ٌ
پھر اِِس پہ وقت بھی آیا تھا اقتداروں کا
وہیں سے رنگ چڑھا اِس پہ پھر بہاروں کا
بنی تھی جان یہ دلی کی، لکھنؤ کی حیات
خطاب، اہلِ زباں تھا وہاں کے لوگوں کا
جو ہر زمانے سے گزری اور اب بھی جاری ہے
وہی تو دوستو اردو زباں ہماری ہے

== ارشد رشید ==

 

[شکیل احمد خان23]

ایک ایک لفظ بچشمِ شوق پڑھ رہا ہوں اور اِس دوران جو جوخیالات ،جذبات، احساسات اور تاثرات فکرو خیال میں بادلوں کی طرح بن بن کر اُڑ رہے ہیں ، اُنہیں مِن و عُن پیش کرتا ہوں:

عجب نشہ ہے یہ اُردو کہ جو اُترتا نہیں
کہ پیاس بُجھ بھی گئی ہو، تو دل تو بھرتا نہیں۔۔۔۔۔۔۔۔۔۔۔۔۔۔۔۔۔۔۔۔۔واہ!( کہ پیاس بجھ بھی اگر جائے دِل یہ بھرتا نہیں)
ہے اک خُمار، جو قلب و نظر پہ چھایا ہے
کہ جیسے ذائقہ وہ ہو کہ جو بِسرتا نہیں۔۔۔۔۔۔۔۔۔۔۔۔۔۔۔۔۔۔۔۔۔واہ، کیا کہنے!
دلوں کے شوق کی، جذبوں کی جس سے یاری ہے
وہی تو دوستو اردو زباں ہماری ہے۔۔۔۔۔۔۔۔۔۔۔۔۔۔۔۔۔۔۔۔۔بے شک!
ٌ
کوئی یہ کہتا ہے پنجاب نے نکھارا اِسے۔۔۔۔۔۔۔۔۔۔۔۔۔۔۔۔۔۔۔۔۔حافظ محمود شیرانی
ہے اک خیال کہ دکن ہی نے سنوارا اِسے۔۔۔۔۔۔۔۔۔۔۔۔۔۔۔۔۔۔۔۔۔نصیر الدین ہاشمی
کسی کو سندھ میں اِس کا وطن دکھائی دے۔۔۔۔۔۔۔۔۔۔۔۔۔۔۔۔۔۔۔۔۔سید سلیمان ندویؒ
کسی نے بولی کھڑی کہہ کہ ہے پُکارا اِسے۔۔۔۔۔۔۔۔۔۔۔۔۔۔۔۔۔۔۔۔۔ڈاکٹر مسعود حسین خان
سو اک جہان کی پھر جس سے رشتہ داری ہے
وہی تو دوستو اردو زباں ہماری ہے۔۔۔۔۔۔۔۔۔۔۔۔۔۔۔۔۔۔۔۔۔بے شک،ماشاءاللہ!
ٌ
ہے اک خیال تو یہ بھی کہ لشکری ہے زباں۔۔۔۔۔۔۔۔۔۔۔۔۔۔۔۔۔۔۔۔۔مولانا محمد حسین آزاد ’’آبِ حیات‘‘
جو مل گئیں کئی افواج تو بنی یہ وہاں
کوئی ملائے ہے تانے پھر اِس کے ہندی سے
کوئی کہے کہ بنایا اِسے عرب نے میاں۔۔۔۔۔۔۔۔۔۔۔۔۔۔۔۔۔۔۔۔۔ کیا قطعہ بند ہے؟
یہ سچ ہے جس کی کہانی بڑی نیاری ہے
وہی تو دوستو اردو زباں ہماری ہے۔۔۔۔۔۔۔۔۔۔۔۔۔۔۔۔۔۔۔۔۔واہ!
ٌ
تو بات یہ اِسی تاریخ سے ہوئی ہے عیاں
کہ ہند کی ہی زبانوں میں یہ رہی تھی نہاں۔۔۔۔۔۔۔۔۔۔۔۔۔۔۔۔۔۔۔۔۔بےشک!
پھر آ ملیں عَرَبی فارسی بھی اس میں کہیں۔۔۔۔۔۔۔۔۔۔۔۔۔۔۔۔۔۔۔۔۔امیرخُسرو اور محمد بن قاسم
تو بن گئی یہی اردو زباں، جو اب ہے یہاں
سو جتنی میری ہے اتنی ہی وہ تمھاری ہے۔۔۔۔۔۔۔۔۔۔۔۔۔۔۔۔۔۔۔۔۔واہ، لاجواب ، بہت خوب ، دریں چہ شک ،مرحبا!
وہی تو دوستو اردو زباں ہماری ہے۔۔۔۔۔۔۔۔۔۔۔۔۔۔۔۔۔۔۔۔۔ماشاء اللہ!
ٌ
پھر اِِس پہ وقت بھی آیا تھا اقتداروں کا۔۔۔۔۔۔۔۔۔۔۔۔۔۔۔۔۔۔۔۔۔قافیے کی تنگی کا سامنا ہے شاید ’’اِقتداروں‘‘
وہیں سے رنگ چڑھا اِس پہ پھر بہاروں کا۔۔۔۔۔۔۔۔۔۔۔۔۔۔۔۔۔۔۔۔۔بے شک!
بنی تھی جان یہ دلی کی، لکھنؤ کی حیات۔۔۔۔۔۔۔۔۔۔۔۔۔۔۔۔۔۔۔۔۔۔ایسا ہی ہے۔وہاں میرتقی میر یہاں خواجہ حیدر علی آتش اور دیگر
خطاب، اہلِ زباں تھا وہاں کے لوگوں کا۔۔۔۔۔۔۔۔۔۔۔۔۔۔۔۔۔۔۔۔۔۔بے شک باقی تمام کے تما م اُن کی نظر میں گونگے تھے
جو ہر زمانے سے گزری اور اب بھی جاری ہے
وہی تو دوستو اردو زباں ہماری ہے۔۔۔۔۔۔۔۔۔۔۔۔۔۔۔۔۔۔۔۔۔ بلا شبہ،
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔بہت خوب جناب ، ماشاء اللہ 14۔اگستِ جشنِ آزادی میں جشنِ اُردُو شامل ہوگیا، واہ!
۔۔۔۔۔ہئیت کے اعتبار سے اِ س ترانے کوکیا نام دیں گے؟ اپنی کم علمی کے سبب پوچھ رہا ہوں جناب ۔ نظم نے بہرحال اِسی موضوع پر لکھی جانے والی نظموں میں ایک شاندار نظم کا اِضافہ کردیا، بہت خوب اور بہت بہت داد، ماشاء اللہ !
ایک اور بات یہ کہ کیونکہ یہاں اُردُو ٹیکسٹ لکھنے میں اُردُو شعر ونغمہ لکھنے کے وسائل کی عدم دستیابی نے اور بھی بصری مشکلات کھڑی کررکھی ہیں ، جن کے تدارک کی امید ہے ہمارے آئی ٹی سے منسلک تیکنیکی لوگ ، کوشش کررہے ہوں گے ۔ میں اِ س نظم کو انشاء اللہ مائکرو سافٹ پر کمپوز کرکے خدمت میں پیش کروں گا،ان شاء اللہ۔

 

[ارشد رشید]

شکیل صاحب - بہت محبت بہت خلوص آپ کا - اتنی تفصیل سے آپ نے ایک ایک مصرعے کا جائزہ لیا - مجھے تو اب خود بھی یہ یاد نہیں تھا کہ کونسا نظریہ کس نے پیش کیا تھا -
آپ کو ماشااللہ بہت معلومات ہیں -
باقی یہ ایک سیدھی سادھی پابند نظم ہے - نظم کے روایتی اسلوب کے مطابق -

بس ایک بات سمجھ نہیں آئی کہ آپ نے لکھا ہے
؎۔۔قافیے کی تنگی کا سامنا ہے شاید ’’اِقتداروں‘‘
یہاں آپ کی قافیے کی تنگی سے کیا مراد ہے - اقتدار کی جمع اقتدارو ں ہی ہوگا اور اردو پہ کسی ایک کے اقتدار کا وقت تو نہیں آیا - یہ بہت سے صاحبانِ اقتدار کے دور سے گزری ہے اور پھر آخر میں یہ پاکستان کے اقتدار تک پہنچی ہے -

ایک بات اور کہ یہاں اردو ٹیکسٹ لکھنے میں کیا مشکلات ہیں ؟ مجھے تو سوائے " کے یہاں کچھ اور لکھنے میں تو دشواری پیش نہیں آتی ؟
بہت بہت شکریہ جناب -

 

[شکیل احمد خان23]

اقتدار کی جمع اقتدارو ں ہی ہوگا

اردو ٹیکسٹ لکھنے میں کیا مشکلات ہیں

سلطنتوں کا جاہ وجلال جن میں اُردُو پلی بڑھی یا کم ازکم اوائل عمری کا زمانہ گزارا لفظ اقتداروں میں مفقودسالگا۔اورنگ زیب عالمگیر تک بالخصوص۔بعد میں اب تک کی حکومتیں اِس لفظ کے مناسبِ حال ہیں ۔۔۔
نظم کی جو مختلف ہئتیں ہیں : مثلث، مخمس، مسدس اور جو کتابوں میں چھپی ملتی ہیں ، اُس صورت میں ایم ایس آفس میں تو لکھنے کی سہولت موجود ہے مگر یہاں ہم اور آپ جو ٹیکسٹ پروگرام استعمال کررہے ہیں اُس میں ایم ایس ورڈ والی سہولتیں نہیں ہیں جس کی وجہ سے غزل کو غزل کی طرح اور مثلث کو مثلث وغیرہ وغیرہ کی طرح لکھنا بندوں کی صورت میں ممکن نہیں البتہ لائنوں اور سطروں میں ہی لکھا جاسکتا ہے ۔ تو یہ سہولت اردو والوں کو دینا چاہیے ۔
بشرطِ فرصت اِس نظم کوایم ایس ورڈ پر لکھ کر پیش کروں گا، ان شاء اللہ!

 

[نور وجدان]

عمدہ پیشکش ہے

 

[شکیل احمد خان23]

سلطنتوں کا جاہ وجلال جن میں اُردُو پلی بڑھی یا کم ازکم اوائل عمری کا زمانہ گزارا لفظ اقتداروں میں مفقودسالگا

۔۔۔۔۔۔۔۔۔۔اور بات یہ بھی ہے کہ ایک زمانے میں ریڈیو پاکستان اور آل انڈیاریڈیو کی اُردُو سروس اور بعدازاں پی ٹی وی پر اُردُو الفاظ کے استعمال ،تلفظ اور اِملا کو سندکا درجہ حاصل تھا ۔۔۔۔۔اب نت نئے ٹی وی چینلز خبروں کی سُرعت سے ترسیل کے جُنون میں سب کچھ بھلا بیٹھے ہیں یعنی حرمتِ الفاظ کا اِنہیں ذراپاس اور لحاظ نہیں رہا ایسے میں یہ لفظ ’’اقتدار‘‘ ہے کہ صبح شام جس کے ایوانوں میں رُسوائیوں اور جگ ہنسائیوں کے قصے اِن کی خبروں کاموضوع اور نشریات کا حصہ بنتے بنتے لفظ اقتدار کی آن بان اور شان کے شایان ہی نہیں رہے۔۔۔۔۔۔۔۔۔

 

[شکیل احمد خان23]

​

اِتفاق سے یہ نظم جشنِ آزادیٔ پاکستان کے موقع پر منظرِ عام پرآئی ہے اور کیونکہ اُردُو ہماری قومی زبان ہے تو میں اِن پُرمسرت لمحات میں اِس خوبصورت نظم کی پیشکش پر جنابِ ارشد رشؔید صاحب کو ہدیہ تبریک و تحسین پیش کرتاہوں ۔ اُن کی یہ نظم پڑھکر مجھے جشنِ آزادیٔ پاکستان کی خوشیاں دوچند محسوس ہوئیں کہ اُردُو ہماری قومی یکجہتی کا نشان اور اِس کا ادب ہماری اُجلی اور صاف سُتھری تہذیب و ثقافت کا آئینہ دار ہے۔ اللہ تعالیٰ رب العزت پاکستان اوراہالیانِ پاکستان کو ہمیشہ خوش وخرم اور مائل بہ ترقی و کمال رکھے ، آمین !

سو جتنی میری ہے اتنی ہی وہ تمھاری ہے
وہی تو دوستو،! ۔،،اُردُو زباں ہماری ہے
​

 

[ارشد رشید]

کیا بات ہے شکیل صاحب - مجھے تو اندازہ ہی نہیں تھا یہ اتنے خوبصورت طریقے سے بھی لکھی جا سکتی ہے - آپ کی بات اب سمجھ میں آئی
واہ صاحب - بہت شکریہ - اللہ خوش رکھے -

 

[صابرہ امین]

​

اِتفاق سے یہ نظم جشنِ آزادیٔ پاکستان کے موقع پر منظرِ عام پرآئی ہے اور کیونکہ اُردُو ہماری قومی زبان ہے تو میں اِن پُرمسرت لمحات میں اِس خوبصورت نظم کی پیشکش پر جنابِ ارشد رشؔید صاحب کو ہدیہ تبریک و تحسین پیش کرتاہوں ۔ اُن کی یہ نظم پڑھکر مجھے جشنِ آزادیٔ پاکستان کی خوشیاں دوچند محسوس ہوئیں کہ اُردُو ہماری قومی یکجہتی کا نشان اور اِس کا ادب ہماری اُجلی اور صاف سُتھری تہذیب و ثقافت کا آئینہ دار ہے۔ اللہ تعالیٰ رب العزت پاکستان اوراہالیانِ پاکستان کو ہمیشہ خوش وخرم اور مائل بہ ترقی و کمال رکھے ، آمین !

​

زبردست۔۔ کیا بات ہے!!