نسیمِ سحر - افسر میرٹھی

[حسان خان]

ہنگامِ صبح ناز سے بادِ صبا چلی​

ہر چار سمت باغ میں کلیاں کھِلا چلی​

جس پھول کے قریب سے گزری ہنسا چلی​

سبزہ جو خواب میں تھا اُسے بھی جگا چلی​

کلیوں سے چھیڑ کرتی چلی گُدگُدا چلی​

ہر گُل سے کھیلتی ہوئی بادِ صبا چلی​

پودوں نے گود میں جو لیا تو پلٹ گئی​

شرمائی اور لجائی کٹی اور سمٹ گئی​

​

اک سانس لے کے پھر روشوں سے گزر چلی​

بے خوف بے ہراس چلی بے خطر چلی​

دامن ہزار طرح کی خوشبو سے بھر چلی​

شبنم سے چھو کے بھیگ گئی تربتر چلی​

غنچوں کو چھیڑ چھیڑ کے شرمندہ کر چلی​

کس ڈھنگ سے چمن میں نسیمِ سحر چلی​

اک کنج میں جو پہنچی تو چکرا کے رہ گئی​

بل تو بہت سے کھائے پہ بل کھا کے رہ گئی​

​

پھر کنج سے نکل کے بہت ناتواں چلی​

اور خشک پتیوں کا لئے کارواں چلی​

کچھ ٹھنڈی ٹھنڈی سانس بھرے نیم جاں چلی​

بیرونِ باغ صورتِ عمرِ رواں چلی​

خاک اس قدر اڑی کہ بہت ہی گراں چلی​

یہ کون جانتا ہے چمن سے کہاں چلی​

افسر صبا ہر ایک کو مسرور کر گئی​

کیفیتوں سے روح کو معمور کر گئی​

(افسر میرٹھی)​