جوش نازک اندامانِ کالج سے خطاب! - جوش ملیح آبادی

[حسان خان]

چھین لی تم نے نسائیت سے ہر شیریں ادا​

مرحبا، اے نازک اندامانِ کالج! مرحبا​

​

جنگ سر پر، اور یہ محبوبیت چھائی ہوئی​

ناز سے نیچی نگاہیں، چال اٹھلائی ہوئی​

​

انکھڑیوں میں عشوۂ ترکانہ در کھولے ہوئے​

'سینٹ' کی خوشبو میں روحِ ناز پر تولے ہوئے​

​

'خال و خد' سے جذب ہائے صنفِ نازک آشکار​

'کرزنی' چہروں میں 'زن' بننے کے ارماں بے قرار​

​

الحذر! یہ جنبشِ مژگاں کا شیریں ارتعاش​

عزتِ آبا کا دل ہے جس کی رَو میں پاش پاش​

​

الاماں! یہ زینتیں، موزے ہیں گو اترے ہوئے​

ذوق ہے گھنگرو کا 'گیٹس' پاؤں میں پہنے ہوئے​

​

ریشمی رومال سے ہے فرقِ نازک پر بہار​

اوڑھنی پر دیدنی ہے راہ کا گرد و غبار​

​

نازکی کا مقتضیٰ، پتلی چھڑی باندھے ہوئے​

شوق کنگن کا کلائی پر گھڑی باندھے ہوئے​

​

جنگ اور نازک کلائی، پیچ ہیں تقدیر کے​

مڑ نہ جائے گی 'نگوڑی' بوجھ سے شمشیر کے​

​

پاؤں رکھتے ہو دمِ گُل گشت کس کس ناز سے​

اے میں قرباں! رن میں نکلو گے اسی انداز سے؟​

​

دیر سے توپوں کے منہ کھولے ہوئے ہے روزگار​

سینۂ گیتی میں ہے جس کی دمک سے خلفشار​

​

شغلِ زینت سے تمہیں فرصت مگر ملتی نہیں​

کیا تمہارے پاؤں کے نیچے زمیں ہلتی نہیں؟​

​

سن لو جو موزوں نہیں مردانہ سیرت کے لیے​

زندگی اُن کی وبا ہے آدمیت کے لیے​

​

مرد کہتے ہیں اُسے، اے مانگ چوٹی کے غلام​

جس کے ہاتھوں میں ہو طوفانی عناصر کی لگام​

​

مرد کی تخلیق ہے زور آزمانے کے لیے​

گردنیں سرکش حوادث کی جھکانے کے لیے​

​

مرد ہے سیلاب کے اندر اکڑنے کے لیے​

بحر کی بپھری ہوئی موجوں سے لڑنے کے لیے​

​

مرد کہتے ہیں اُسے اے بندگانِ طمطراق​

جو جلالِ برق و باراں کا اڑاتا ہو مذاق​

​

جنگ میں ہو بانکپن جس کی شجاعت کا گواہ​

رزم کے میداں میں کج کرتا ہو ماتھے پر کلاہ​

​

دوڑتا ہو شعلہ خو بجلی کا دامن تھامنے​

مسکراتا ہو گرجتے بادلوں کے سامنے​

​

مضحکہ کرتا ہو خوں آشام تلواروں کے ساتھ​

کھیلتی ہوں جس کی نیندیں سرخ انگاروں کے ساتھ​

​

تم مگر اِس زندگی کے کھیل سے رہتے ہو دور​

آفریں اے عصرِ حاضر کے جوانانِ غیور!​

​

ہے تمہارا ارتقا پروردۂ سعئ زوال​

الاماں تعلیمِ کالج کا اجل پرور مآل​

​

جیب میں کوڑی نہیں اور اس قدر شان و شکوہ​

سر جھکا لے شرم سے اے فاقہ مستوں کے گروہ​

​

یوں تمہارے منہ کے اندر ہے فرنگی کی زباں​

خوف ہے گونگا نہ ہو جائے کہیں ہندوستاں​

​

یہ لباسِ مغربی جلووں کو چمکاتا نہیں​

تم کو اِس بہروپیے پن سے حجاب آتا نہیں​

​

کیا غضب ہے تم سے بوئے ایشیا آتی نہیں​

سچ کہو کیا واقعی تم کو حیا آتی نہیں؟​

​

زندگی طوفان ہے، اور ناؤ ہو تم پاپ کی​

آہ جیتی جاگتی بدبختیو ماں باپ کی​

​

یہ بھی کوئی زندگی ہے، غم کی ماری زندگی​

نوعِ انسانی کی ذلت ہے تمہاری زندگی​

​

یہ بھی کوئی زندگی ہے، سست و غافل زندگی​

بے حمیت، بدگہر، بے روح، بزدل زندگی​

​

یہ بھی کوئی زندگی ہے، پست و ابتر زندگی​

فکر سے کچلی ہوئی، بیمار و لاغر زندگی​

​

یہ بھی کوئی زندگی ہے، بے نظام و بے اساس​

جذبۂ تقلیدِ مغرب میں زبون و بدحواس​

​

آہ بھرتی زندگی، آنسو بہاتی زندگی​

بھوک کی دلدل کی تہ میں کلبلاتی زندگی​

​

بھاگتی، بچتی، دبکتی، تھرتھراتی زندگی​

کانپتی، ڈرتی لرزتی، کپکپاتی زندگی​

​

جس کو اک دن بھی نہ حاصل فارغ البالی ہوئی​

موت کے بے رحم و سرد آغوش کی پالی ہوئی​

​

راستہ دیتی ہوئی، پیہم سرکتی زندگی​

پیٹ کے بل رینگنے والی سسکتی زندگی​

​

مفلسی کی یورشِ پیہم سے گھبرائی ہوئی​

غیر کی روندی ہوئی، دشمن کی ٹھکرائی ہوئی​

​

آہ، اے بیگانۂ انجام و آغازِ حیات​

سُن، کہ تا کھل جائے تیری 'موت' پر رازِ حیات​

​

اہلِ عالم کی نظر میں محترم ہوتا نہیں​

مرد جب تک صاحبِ سیف و قلم ہوتا نہیں​

​

سیف کا دامن تو ہے اک عمر سے چھوٹا ہوا​

اور قلم ہے اک، سو وہ بھی خیر سے ٹوٹا ہوا​

​

کچھ خبر بھی ہے تجھے اے طفلکِ زار و نزار​

زیست کا ہے دست و بازو کی صلابت پر مدار​

​

غور سے سن اے نگارِ مجلسِ تہذیبِ خام​

کھردرے ہاتھوں میں رہتی ہے حکومت کی لگام​

​

بل پہ لوہے کے جو لے سکتا ہے دنیا سے خراج​

جگمگاتا ہے اُسی کے فرق پر سونے کا تاج​

​

فکرِ ناقص کو تری سرمایۂ تحقیق دے​

کاش دنیا مرد بننے کی تجھے توفیق دے​

​

عزم تیرا آگ کے سانچے میں جب ڈھل جائے گا​

طوقِ محکومی کا لوہا خود بخود گل جائے گا​

​

(جوش ملیح آبادی)​

۱۹۳۱ء​