نئی ہر روز آفت ہے محبت میں مری جاں کو - حسرت شروانی

[حسان خان]

نئی ہر روز آفت ہے محبت میں مری جاں کو​

دل آیا تو وہ کہتے ہیں نکالو دل سے ارماں کو​

​

ضیا بخشی رخِ پُرنور نے صبحِ بہاراں کو​

دل آرا کر دیا زلفِ معنبر نے شبستاں کو​

​

کیے دیتی ہے وحشت پارہ پارہ کسوتِ ہستی​

کہاں فرصت کہ بیٹھوں چاک کرنے میں گریباں کو​

​

خلش بھر دی کچھ ایسی لذت افزا تیری چٹکی نے​

کیا دل نے تصور نوکِ مژگاں نوکِ پیکاں کو​

​

متاعِ دین و ایماں تُو بچائے تو بچے یا رب​

وہ چشمِ فتنہ ساماں تاکتی ہے اب تو ایماں کو​

​

بجا ہے گر کہیں یک جاں دو قالب وادیِ وحشت​

ترے خارِ مغیلاں کو مرے تارِ گریباں کو​

​

قدم تیرا تو دم میرا یہی آباد رکھتے ہیں​

شبستاں کو بیاباں کو چمن کو بیتِ احزاں کو​

​

گئے وہ دن کہ اپنا آشیاں تھا صحنِ گلشن میں​

قفس سے جھانک لیتے ہیں کبھی اب تو گلستاں کو​

​

دلِ وحشی کو کیا تسکین ہو صحرا نوردی سے​

اٹھا کر کوئی رکھ دے گوشۂ دل میں بیاباں کو​

​

جنوں کی نکتہ سنجی ناقۂ لیلیٰ کو رغبت تھی​

بنایا میلِ سرمہ قیس نے خارِ مغیلاں کو​

​

کبھی وہ زلفِ عنبر بُو نشاطِ خوابِ راحت تھی​

ترستی ہیں یہ آنکھیں اب تو اک خوابِ پریشاں کو​

​

معاذ اللہ وہ تُرک چشم جس کے اک اشارے نے​

بنایا غازۂ روئے زمیں خونِ شہیداں کو​

​

نمک ریزی سے راحت ہے دلِ مجروح کو حسرت​

بنایا محرمِ رازِ نہاں ہم نے نمکداں کو​

​

(حسرت شروانی)​

۲۹ دسمبر ۱۹۲۹ء​