میری سخنوری پہ عبث قیل و قال ہے - مرزا عزیز بیگ سہارنپوری (مخمس بر غزلِ غالب)

[حسان خان]

میری سخنوری پہ عبث قیل و قال ہے​

مطلب کو میرے پائے کوئی کیا مجال ہے​

کہتا ہوں سب کچھ اور زباں میری لال ہے​

گر خامشی سے فائدہ اخفائے حال ہے​

خوش ہوں کہ میری بات سمجھنی محال ہے​

​

احباب چپ ہیں سن کے دلِ زار کا گلہ​

وردِ زباں ہے چرخِ ستمگار کا گلہ​

سنتا ہے کون یارِ جفاکار کا گلہ​

کس کو سناؤں حسرتِ اظہار کا گلہ​

دل فردِ جمع و خرجِ زبانہائے لال ہے​

​

وارفتہ دل کو کب سے ہے ارمان دید کا​

آنکھیں مری ہوں کاش کبھی جلوہ آشنا​

مشکل تجھے نہیں کہ حجابات دے اٹھا​

کس پردے میں ہے آئنہ پرداز اے خدا​

رحمت کہ عذرخواہِ لبِ بے سوال ہے​

​

پروا اُسے کسی کی ہو کیا وہ تو ہے غنی​

پرخاش ہو کسی سے اُسے یہ ہے بدظنی​

روکے ہوئے حجاب ہے یا پاک دامنی​

ہے ہے! خدانخواستہ وہ اور دشمنی؟​

اے شوقِ منفعل! یہ تجھے کیا خیال ہے​

​

خوشبوئے مصطفیٰ سے معطر ہے یہ مکان​

جس پر درود بھیجتے رہتے ہیں انس و جان​

اس کے طواف میں ہے شب و روز آسمان​

مشکیں لباسِ کعبہ علی کے قدم سے جان​

نافِ زمین ہے نہ کہ نافِ غزال ہے​

​

گردش کا میری اور ہی کچھ رنگ ڈھنگ ہے​

گردوں بھی دیکھ کر مری حالت کو دنگ ہے​

جوشِ جنوں میں یہ تک و دو کی امنگ ہے​

وحشت پہ میری عرصۂ آفاق تنگ ہے​

دریا زمین کو عرقِ انفعال ہے​

​

مرزاؔ کی طرح نفس کو سمجھائیو اسدؔ​

اس خواب پر نہ بھول کر اترائیو اسدؔ​

دھوکہ نہ واہمے سے کہیں کھائیو اسدؔ​

ہستی کے مت فریب میں آ جائیو اسدؔ​

عالم تمام حلقۂ دامِ خیال ہے​

​

(مرزا عزیز بیگ سہارنپوری)​

 

[صائمہ شاہ]

واہ
گر خامشی سے فائدہ اخفائے حال ہے
خوش ہوں کہ میری بات سمجھنی محال ہے

 

[محمداحمد]

​

مرزاؔ کی طرح نفس کو سمجھائیو اسدؔ​

اس خواب پر نہ بھول کر اترائیو اسدؔ​

دھوکہ نہ واہمے سے کہیں کھائیو اسدؔ​

ہستی کے مت فریب میں آ جائیو اسدؔ​

عالم تمام حلقۂ دامِ خیال ہے​

بہت ہی خوب حسان۔ عمدہ انتخاب ہے۔