مولانا اقبال سہیل " رنگ و بو کے سرابستانوں میں ششدر چھوڑ کر "

[طارق شاہ]

غزل​

مولانا اقبال سہیل ​

​

رنگ و بُو کے سرابستانوں میں ششدر چھوڑ کر​

کیا ہُوا حُسنِ حقیقت، مجھ کو مضطر چھوڑ کر​

​

جی لگے گا خاک یہ جاں بخش منظر چھوڑکر​

خلد کو جائے بلا میری تِرا در چھوڑ کر​

​

دیکھ اے خورشیدِ محشر، تیری رسوائی نہ ہو​

مشقِ تابِش کر تُو میرا دامنِ تر چھوڑ کر​

​

حشر! کس کی بزم ہے یارب، کہ دوڑے سر کے بل​

رند ساغر چھوڑ کر، زُہّاد منبر چھوڑ کر​

​

کوئی کعبہ چاہئےمجھ کو پئے مشقِ طواف ​

ڈھونڈ نے جائیں کہاں، اب دل کا مَحوَر چھوڑ کر​

​

دہر کا ہر ذرّہ باہم برسرِ پیکار ہے​

کون اِس پردے میں ہے، چشمِ فسُوں گر چھوڑ کر​

​

ہیں بہت میداں تِری حشرآفرینی کے لئے​

دل کی دنیا اے نگاہِ فتنہ پروَر چھوڑ کر​

​

رہ گئی ہے کیا قفَس میں اب ہماری یادگار​

چند تِنکے اورکچھ ٹُوٹے ہُوئے پر چھوڑ کر​

​

سو جفاؤں پر بھی رکھّا حُسن کا پاسِ ادب​

کب کہا کچھ اُن کو میں نے بندہ پروَر چھوڑ کر​

​

اتنی وُسْعَت پر نہ نِکلا جب تپش کا حوصلہ!​

اوراب جائیں کہاں صحرائے محشر چھوڑ کر​

​

ہوچکا زورِ طبیعت حضرتِ اقبال کا​

اب رہا ہی کیا ہے اک روحِ مُصوّر چھوڑ کر​

​

مولانا اقبال سہیل ​

​