بافقیہ
محفلین
مُردوں کی مسیحائی۔ ۱
تحریر: مولانا عبد الماجد دریابادیؒ
گمراہی کی سیاہ چادر
انسان زندہ بنایا گیا ہے،لیکن یہی زندہ کبھی مُردہ بھی ہوجاتا ہے۔ دنیا روشن پیدا کی گئی ہے، لیکن یہی روشنی کبھی تاریکی میں بھی تبدیل ہوجاتی ہے،روئے زمین کے مختلف حصوں میں بڑے بڑے ہادی و رہنما آئے اور گزر چکے لیکن اب ایک مدت سے دنیا، ان کی ہدایتوں سے محروم ہے۔ بارش اپنے موسم میں زمین کو سیراب کرچکی تھی، لیکن اب جلتی اور تپتی ہوئی زمین کو ہونٹوں پر پیاس سے خشکی کی پٹپریاں جمی ہوئی ہیں۔ آخری نبی حضرت مسیح علیہ السلام کے زمانہ کو ساڑھے پانچ سو سال کی مدّت گزر چکی ہے، اور اب سطح زمین نورانیت کے فیض سے یکسر محروم ہے۔ دن کی روشنی چھپ چکی ہے، اور عالم انسانیت پر رات کی سیاہی چھائی ہوئی ہے۔کسی ایک ملک کی تخصیص نہیں،آفتاب کے طلوع ہونیکی جگہ، مشرق اور آفتاب کے غروب ہونے کی جگہ مغرب، سب گمراہی و سرگشتگی کی اسی سیاہ چادرمیں لپٹے ہوئے ہیں۔ بحر وبر، شرق وغرب، عرب وعجم سب کی روحانی زندگی موت سے ظَہَرَ الفَسَادُ فِی البَرِّ وَالبَحْرِ بِمَا کَسَبَتْ اَیْدِیْ النّاسِ (روم:۵) تبدیل ہو چکی ہے اور کائنات انسانی کی ساری فضاء شقاوت و نفس پرستی، بدی و بدکاری،شرارت و نفاق کے گہرے بادلوں سے سیاہ ہورہی ہے۔
محروم عرب
یہ حال سارے عالم انسانیت کا ہے، لیکن براعظم ایشیاء کے جنوب ومغرب کا وہ حصہ جو عرب کے نام سے موسوم ہے،اس عموم میں ایک خصوص رکھتا ہے۔ یہ سرزمین جس طرح مادی حیثیت سے بنجر ہے، شاید اسی طرح اب تک فطرت کی روحانی بارشوں اور بخششوں سے بھی محروم ہے۔ اس کی تباہ کاریاں اورتیرہ بختیاں سارے عالم کے لئے نمونہ عبرت ہیں۔ بیمار کل دنیا ہے،لیکن عرب کا مریض دق میں مبتلا ہے۔ خشک سالی سب کہیں ہے، لیکن یہاں قحط شدید پڑا ہوا ہے۔ اسکی اخلاقی پستی حد سے گزر چکی ہے، اس کی روحانی بیماریاں تقریباً لا علاج ہو چکی ہیں، اس کی سرکشی وتباہ کاریاں، خودپرستی اَلْاَعْرَابُ اَشَدُّ کُفْرًا وَّنِفَاقاً وَّاَجْدَرُ اَلَّا یَعْلَمُوْا حُدُوْدَ َما اَنْزَلَ اللہُ عَلیٰ رَسُوْلِہ ( توبہ،ع۱۲) خدا فراموشی، عقائد کی خرابی، اعمال کی ابتری، نے اسے اس لا ئق بھی نہیں رکھا ہے کہ کوئی بشری کوشش اصلاح حال میں کامیاب ہوسکے۔ رشد وہدایت، پاک بازی وپاکیزہ خوئی، حسن عمل و نیک کرداری کا کیا ذکر ہے، اب تو اس قوم کی ساری زندگی کا خلاصہ صرف ایک لفظ گمراہی یا ضلالت، میں بیان کیاجا سکتا ہے اور ضلالت بھی کیسی؟ وَاِنْ کَانُوْا مِنْ قَبْلِ لَفِیْ ضلَاٰلٍ مُّبِیْنٍ (جمعہ:ع۱) تاویل وتوجیہ کی گنجائش سے ماوراء بالکل واضح وصریح!ساری اصلاحوں کی بنیاد قلب کی صلاحیت پر ہوتی ہے۔قلب میں جب تک نرمی و گداز باقی ہے، اس وقت تک اصلاح حال کی امیدقائم کی جاسکتی ہے، لیکن ان بد نصیبوں کی نوبت یہاں تک پہنچ چکی ہے، کہ ان کے سینوں میں انسانیت کی نرمی اور قلبوں میں آدمیّت کے چشمے خشک ہو چکے ہیں۔ فَہِيَ کَالْحِجَارَۃِ اَوْاَشَدُّ قَسْوَۃً (بقرہ) اوراس کے بجائے دلوں میں پتھروں کی سی سختی،بلکہ پتھروں سے بھی بڑھ کر سختی پیدا ہوگئی ہے، اور قبول حق کے گویا سارے دروازے انہوں نے اپنے ہاتھوں اپنے اوپر بند کر لیے ہیں !بدکاریوں اور بدکرداریوں میں مسلسل مبتلا رہتے رہتے، ان کے دل ودماغ، انکی عقل وذہن مسخ ہوچکے ہیں، حقوق وباطل، نیک وبد، نور وظلمت کا فرق ان کی نظروں سے مٹ چکاہے۔ اُوْلئِکَ کَالاَنْعَامِ بَلْ ہُمْ اَضَلُّ(اعراف) جانوروں کی سی کیفیت پیدا ہوگئی ہے، بلکہ اپنی کج فہمی، بے بصری اور تنگ نظری میں جانوروں سے بھی آگے نکل چکے ہیں!
مؤرخین کا بیان
یہ تصریحات اس کتاب پاک کی ہیں، جو ہرقسم کے مبالغہ وافراط سے بالاتر ہے، اور جس کا ایک ایک حرف، صداقت وحقیقت کے اونچے سے اونچے معیار کا نمونہ ہے، تاہم بہتر ہوگا، کہ اس زمانہ کے ’’روشن خیال‘‘ اپنی تشفی کے لئے ’’ محققین فن‘‘ و ’’ماہرین تاریخ‘‘ کے بیانات پر بھی ایک سرسری نظر کرتے چلیں۔
’’دورِ جاہلیت کی سترہ سو جنگیں مشہور چلی آتی ہیں، یہ لڑائیاں اس شدّت عناد کے ساتھ قائم رہتی تھیں جو خانہ جنگیوں کی خصوصیت ہے۔ پشتہا پشت کے کسی بھولے بسرے واقعہ کا نثر یا نظم میں تذکرہ، عداوتوں کے خرمن میں چنگاری بن جانے کے لیے بالکل کافی ہوتا تھا، پھر ہر فرد،اگر نہیں،کم ازکم ہر خاندان تو ضرور اپنے تئیں ہر فیصلہ اور انتقام کا پورا مجاز سمجھتا تھا۔۔۔عورتوں اور داڑھیوں کی توہین بات بات میں نکل آتی تھی۔ کسی نے ذرا بھی بیجاشوخی کی، کسی نے ذرا بھی ہتک آمیز بات کہی پس پھر مجرم کے خون کے بغیر جنگ نہیں فرو ہو سکتی اور کینہ بھی اس بلا کا،کہ مہینوں بلکہ برسوں تک انتقام کا سلسلہ نہیں ختم ہوتا؟‘‘
یہ پہلےالفاظ مشہور مؤرخ رومہ، ایڈورڈگبن کے ہیں۔(تاریخ زوال مملکت رومہ باب ۵۰)
’’ مکہ اور سارے جزیر نمائے عرب پر، ایک بے انداز مدّت سے روحانی موت طار ی چلی آرہی تھی۔یہودیت، مسیحیت اور عقلیت کا دماغ عرب پر کل اتنا ہی اثرہوا تھا، کہ جیسے ایک پر سکون جھیل کی سطح پر کچھ ہلکی موجیں لہرانے لگیں اور نیچے بدستور سکون قائم رہے، یہ لوگ وہم پرستی، شقاوت وبدکاری میں ڈوبے ہوئے تھے، ایک عام دستور یہ تھا کہ بڑے بیٹے کو باپ کی جائیداد کے ساتھ اسکی بیویاں بھی ترکہ میں مل جاتی تھیں۔ جذبہ غرور نیز افلاس کی بناء پر دختر کشی کی رسم بھی ان کے ہاں جاری تھی۔ان کا مذہب شدید بت پرستی تھا۔۔۔۔حشر وجزا کے عقیدہ سے گویا بالکل ناآشنا تھے۔‘‘
’’محمدﷺ کی بعثت سے قبل، عربوں میں مذہبی اصلاح کا ہونا ایسا ہی بعید ازقیاس معلوم ہوتا تھا، جیسا کہ ان کا ملکی وسیاسی حیثیت سے ایک قوم بن جانا۔ دین عرب کی بنیاد بہت گہری بت پرستی پر تھی، جس کی اصلاح کی، مصری و شامی مسیحیت کی جانب سے صدیوں سے کوشش ہورہی تھی اور ہمیشہ ناکامی ہی رہتی تھی۔‘‘
یہ اعتراف سرولیم میورکو کرنے پڑے ہیں۔ لائف آف محمدﷺ، باب۱۲۔نیز مقدمہ الکتاب
’’انسان کی جان لے لینا سرے سے کوئی اخلاقی جرم نہ تھا۔ نہ قتل اتفاقی، قتل عمد کے درمیان کوئی فرق کیا جاتا تھا۔۔۔۔قتل کا انتقام نہ لینا باعث توہین تھا۔۔۔۔شہوت پرستی وبے عصمتی کی گرم بازاری تھی۔ دوسرے کے مال کی حفاظت، پاس وفا، اور عزت کے جذبات کی، عرب جاہلیت میں کچھ قدرنہ تھی۔‘‘
یہ شہادت اس مشہور دشمنِ اسلام کو دینی پڑی ہے، جسے دنیا، آکسفرڈ یونیورسٹی کے پروفیسر مارگولیس کے نام سے پکارتی ہے۔محمدﷺبسلسلہ سوانح مشاہیر اقوام، باب اوّل
’’مکہّ کے مادّی تجارتی شہر میں غرض پرستی اور سودخوری کا دور دورہ تھا۔ لوگوں کے وقت گزاری کے لیے عورتیں تھیں، شراب تھی، جُوا تھا جس کی لاٹھی اس کی بھینس کاقانون جاری تھا۔ بیوہ عورتوں، یتیموں اور کمزوروں کا کوئی حق نہ تھا۔۔۔۔اللہ کے نام سے اہل مکّہ ضرور واقف ہوگئے تھے، لیکن اپنی عملی زندگی میں انہوں نے اس سے کوئی سروکار نہیں رکھا تھا، اس لیے کہ خالق کے معنی ان کے نزیک حاکم ومالک کے نہ تھے۔ اپنے نفع ونقصان اور مشرکانہ رسوم کے لیے ان کے سر ہر صنف موجودات کے آگے جھکے ہوئے تھے۔‘‘
یہ تحقیقات، لیڈن یونیورسٹی(ہالینڈ) کے مشہور تازہ ’’ماہرعربیات واسلامیات‘‘ پروفیسر ہرگرونج کی ہیں، جو امریکہ کی یونیوسٹی کے سامنے مخصوص اسی موضوع پر تقریریں کرنے کے لیے مقرر ہوئے تھے۔ ( محمد نزم، باب اوّل)
خلاصہ بیان کو ایک روشن خیال مسلمان کی زبان سے جنھوں نے اپنی قوم کے روشن خیالوں ہی کے لیے سیرت محمدیﷺ پر ایک ضخیم کتاب تالیف فرمائی ہے، سن لینا چاہئے :
’’ بتوں پر آدمیوں کی قربانی چڑھائی جاتی تھی۔ باپ کی منکوحہ بیٹے کو وراثت میں ملتی تھی۔حقیقی بہنوں سے ایک ساتھ شادی جائز تھی۔ ازدواج کی کوئی حد نہ تھی۔ قماربازی، شراب خواری، زناکاری کا رواج عام تھا، بے حیائی کی یہ حالت تھی، کہ سب سے بڑا نامور شاعر امرءالقیس، جو شہزادہ بھی تھا، قصیدہ میں اپنی پھوپھی زاد بہن کے ساتھ اپنی بدکاری کا واقعہ مزے لے لے کر بیان کرتا ہے اور یہ قصیدہ در ِکعبہ پر آویزاں کیا جاتا ہے۔ لڑائیوں میں لوگوں کو زندہ جلا دینا، مستورات کے پیٹ چاک کردینا، معصوم بچوں کو تہِ تیغ کرنا عموما جائز تھا‘‘۔(سیرۃ النبی مولانا شبلی، جلد اوّل صفحہ ۹۳)
فضا اور بعثت
یہ فضا ہے، جس میں ایک بے کس وبے یاور یتیم اور اَن پڑھ بچہ اپنی آنکھیں کھولتا ہے۔ کار ساز فطرت کی مشیت یہ ہوتی ہے کہ اسی بے کس وناتواں کے ذریعہ سے،ایک قبیلہ کی نہیں، ایک قوم کی نہیں، ایک ملک کی نہیں، سارے عالم، بلکہ سارے عالموں لِیَکُوْنَ لِلْعَالَمِیْنَ نَذِیْرًا کی اصلاح کا کام لیا جائے اور اسے سارے جہانوں کی جانب یہ پیغام دے کر بھیجا جائے کہ فطرت سے بغاوت کرتے رہنے والوں کا بالآخر کیا انجام ہونے والا ہے۔ پیامبر اپنا پیام پہنچاتاہے اور اس کے گرد و پیش کی ساری شیطانی قوتیں دولت وقوت کے سایہ میں جمع ہوکر اسکی مخالفت وعداوت پر کمر بستہ ہوجاتی ہیں۔ اس عالی ظرف کا ظرف، سالہا سال تک ہرقسم کی تکلیف وتوہین، اذیت ورسوائی کے مقابلہ میں سپر بنا رہتا ہے تاآنکہ مخالفین کے حوصلے اور بڑھ جاتے ہیں اور کھلم کھلا یہ مطالبہ ہونے لگتا ہے، اگر حق کی قوت ونصرت اس کے ساتھ ہے، تو آخر حق وباطل، نور ظلمت میں کھلا ہوا فرق، فرقان اس پر کیوں نہیں نازل کردیا جاتا، جواب ملتا ہے، کہ فرقان تو شروع ہی سے اس کے ہمراہ ہے، قَدْ تَّبَیَّنَ الرُّشْدُمِنَ اَلْغَیِّ حق وباطل کی راہیں توآغاز ہی سے الگ الگ ہیں۔ البتہ اے بے بصرو، تم جو سوا مادی فتح وفیروزمندی کے، کسی اور فرقان کو محسوس کرنے سے معذور ہو اور دن رات اس قسم کے واہی تباہی خیالات اور بچوں کے سے مطالبات پیش کرتے رہتے ہو کہ یہ پیغمبر تو ہم ہی انسانوں کی طرح کھاتا پیتا، اور بازاروں میں مَالِ ہذَا اَلرَسُولِ یَاکُلُ الطَّعَامَ وَیَمْشِیْ فِی الاَسْوَاقِ لَوْلَااُنْزِلَ اِلَیْہِ مَلَکٌ، فَیَکُوْنَ مَعَہُ نَذِیْراً اَوْ یُلْقی اِلَیْہِ کَنْزٌ اَوْ تَکُوْنَ لَہُ جَنَّۃٌ یَّاْکُلُ مِنْہَا۔چلتا پھرتا ہے، اس کے ساتھ انسانی قوی سے ماوری کوئی فرشتہ کیوں نہ اتارا گیا، یا اسے جنت فکر معاش سے بے نیاز کرنے اور عیش سے زندگی گزارنے کوغیب سے کوئی خزانہ اس کے پاس کیوں اُتر آیا، یا اسے جنت کے موعود اور مفروضہ باغوں کی طرح کوئی باغ کیوں نہیں نصیب ہو جاتا! سو اپنی ان خام خیالیوں اور بے مغزیوں کے جواب میں تیار ہو جاؤ‘‘ اسی دنیا میں فرقان اتر کررہے گا اور ایسا فرقان، جسے تمہارے مادّی حواس بھی محسوس کرکے رہیں گے۔تم ایک غیبی قوت، فرشتے کے نزول کا مطالبہ کر رہے ہو، اس نبی ﷺکا مرتبہ تو کہیں بڑھ چڑھ کر ہے، اس کے غلاموں پر ان غیبی قوتوں کا نزول ہوگا جسکی توجیہ وتاویل،تاویل وتعلیل میں تمہارے بڑے بڑے فلسفیوں اور حکیموں، عاقلوں اور داناؤں کی دانائی و زیرکی عاجز رہ جائے گی۔تَبَاَرکَ الَّذِیْ نَزَّلَ الْفُرْقَانَ عَلی عَبْدِہِ اور آج تم ایک باغ کو انتہائی نعمت سمجھ رہے ہو کل دیکھنا کہ اسی بندہ کے غلام، ان غلاموں کے غلام قیصر و کسریٰ کے تخت الٹ دیں گے۔ رومہ و ایران کی زبردست شہنشائیاں زیر وزبر کردیں گے اور مصر وافغانستان، عراق وایران، ترکی وہندستان کی چمن وگلشن سبزہ زار وگلستان ان کے قدموں سے پامال ہوکر رہیں گے۔
ہدایت کی روشنی
کیسی بابرکت، کس کثرت سے برکت نازل کرنے والی کس طرح دائمی ومسلسل برکت نازل کرنے والی، وہ پاک ذات ہے جس نے تَبَارَکَ الَّذِیْ جَعَلَ فِی السَّمَاءِ بُرُوْجًا وَّجَعَلَ فِیْہَاسِرَاجًا وَّقَمَرًا مُّنِیْرًا۔آسماں میں ستارے اور روشن آفتاب اور اجالا کرنے والا چاند بنا دیا۔جس پروردگار نے مادی رہنمائی و روشنی ورہنمائی کے لیے سب کچھ سامان مہیّاکردئے ہیں، کیا وہ اپنے بندوں کو روحانی روشنی ورہنمائی کے سامان سے محروم رکھے گا؟ آفتاب اسی وقت طلوع ہوتا ہے جب پہلے تاریکی اچھی طرح چھا چکی ہوتی ہے، دنیا کی روحانی تاریکی اب اپنی انتہاکو پہنچ چکی ہے، وقت آگیا ہے کہ سراج منیر تمام عالموں کے روشن کردینے والے چراغ کا طلوع ہو۔ آفتاب جب طلوع ہوتا ہے تو اس کی تڑپ سے چاند بھی جگمگا اٹھتا ہے اور خود روشن ہوکر دوسروں کو روشن کردیتاہے۔ اس آفتاب روحانی کی ضیا باری بھی اسی شدت وقوت کی ہوگی، اسکی شعاعیں دوسروں کو منوّرکرکے انھیں خود چاند کی طرح نورانی ونورا فگں بنادیں گی پھر یہ اسی کار ساز مطلق کا بنایا ہوا عام قانون فطرت ہے کہ رات اور وَہُوَ الَّذِیْ جَعَلَ الَّلیْلَ وَالنَّھَارَ خِلْفَۃًً لِّمَنْ اَرَادَ اَنْ یَّذَّکَّرَ اَوْ اَرَادَ شُکُوْرًا۔دن ایک دوسرے کے پیچھے آتے رہتے ہیں اور جن کے دلوں میں نصیحت قبول کرنے اور بندہ شکر گزار بننے کی صلاحیت ہے، ان کے درس کے لیے یہ قانون مادی بالکل کافی ہے۔ جب عالم جسم ومادّہ میں ہررات کے بعد دن کا آنا لازمی ہے، تو کیاکائنات جان وروح میں ہمیشہ تاریکی ہی چھائی ہوئی رہے گی؟ نفس پرستی وخدا فراموشی کی طویل شب دیجور کا ختم ہوکر رہنا لازمی تھا، وہ ختم ہوئی اور روحانیت کا آفتاب، اصلاح و ہدایت کا سورج طلوع ہوگیا۔ زندہ فرقان۔ اس زندہ فرقان کی عظمت کو دیکھو، اس نے دیکھتے ہی دیکھتے تمہاری آنکھوں کے سامنے اخلاق کی دنیا میں کیا سے کیا انقلاب پیدا کردیا، تم اس کے پیام میں طرح طرح کی حجتیں نکالتے ہو، سرے سے رحمن ہی کے وجود میں شک کررہے ہو اور ڈھٹائی سے پوچھتے ہو کہ کون رحمن؟ سو اپنے اس اَن دیکھے رحمن کی شان رحمت کو دیکھو، اس کی برکات و رحمانیت کا مشاہدہ کرو کہ تمہاری ہی بنجر سرزمین سے تمہاری ہی مردہ قوم سے تمہاری ہی گردو پیش کیسے کیسے بندگان رحمن پیدا ہوگئے ہیں، جو لوگوں سے بات بات پر وَعِبَادُ الرَّحْمنِ الَّذِیْنَ یَمْشُوْنَ عَلی الأَرْضِ ہَوْنًا وَّاِذَا خَاطَبَہُمُ الْجَاہِلُوْنَ قَالُوْا سَلَامًا لڑنا، بلاوجہ الجھنا تو الگ رہا صدیوں کی اس عادت اور پشتہا پشت کی اس خصلت کو چھوڑ کر اب اس قدرخاکسار ومسکین ہوگئے ہیں کہ ہاتھ پیر کی زیادتیوں اور بات چیت کی سختیوں کا ذکر نہیں، ان کی رفتار تک ان کی فروتنی وحلم پر گواہی دے رہی ہے؟ اور ازخود تو اب کسی سے کیا چھیڑ کریں گے۔ جب دوسر ے اپنی نادانی وسفاہت سے اپنی شرارت وخباثت سے انھیں چھیڑتے ہیں،ان کی دل آزاری کے لئے ان پر اعتراضات کرتے ہیں،تو اس کے معاوضہ میں بھی ان کی جبین تحمل پر شکن نہیں پڑنے پاتی،بلکہ حلم وآشتی صلح و نرمی کے لہجہ میں ان سے اپنی سلامتی چاہتے، یا ان کے حق میں سلامتی کی دعا کرتے گذر جاتے ہیں! ابھی کل کی بات ہے کہ ساری ساری رات، شراب خواری، ناچ رنگ اور بے حیائی کے دوسرے مشغلوں میں کاٹ کر صبح کر دیتے تھے، پر آج وہی خدائے رحمن کے بندے ہیں،وَالَّذِیْنَ یَبِیْتُونَ لِرَبِِّہِمْ سُجَّدًا وَقِیَامًا جویہی نہیں کہ اپنے ان گندے مشغلوں سے یکسر تائب ہو چکے ہیں، بلکہ اب ان کی پوری راتیں نماز و عبادت کی، دعا وقرآن خوانی کی اور تہجد کے سجود وقیام نذر ہونے لگی ہیں اور کچھ یہ نہیں کہ یہ کسی کے ڈر اور دباؤسے، کسی کی مروت میں، یا ریا ونمائش کی غرض سے کررہے ہوں بلکہ قانون پاداش عمل کی ہیبت ان کے دلوں پر طاری ہو چکی ہے،وَالَّذِیْنَ یَقُوْلُوْنَ رَبَّنَا اَصْرِفْ عَنَّا عَذَابَ جَہَنَمَّ اِنَّ عَذَابَہَا کَانَ غَرَامًا اِنََّہَا سَاءَتْ مُسْتَقَرًا وَمُقَامًا ہر بدی کے نتیجہ بد کا خوف ان پر غالب آچکا ہے اور آخری سزا گاہ دوزخ کی سختیاں، ان کی نگاہوں سے اوجھل نہیں ہونے پاتیں۔ اس لیے بکمال خلوص وخضوع، اپنے پروردگار سے دعا کرتے رہتے ہیں، کہ ان سے انھیں محفوظ رکھے اورجس پر اس قدر ہیبت الہی غالب ہوگی کہ وہ لازمی طور پر اپنی زندگی کے ہر ہر جزئیہ میں نیکی ونیک کرداری، تقوی وحسنِ عمل کی ٹوہ میں برابر لگا رہے گا پس یہ نیک برگزیدہ بندے وَالَّذِیْنَ اِذَا اَنْفَقُوْا لَمْ یُسْرِفُوْا وَلَمْ یَقْتُرُوْا وَکَانَ بَیْنَ ذَلِکَ قَوَامًا۔بھی محض حقوق اللہ کی ادائیگی میں مستعد نہیں بلکہ حقوق العباد کے ادا کرنے میں بھی ویسے ہی محتاط وذوق شناس ہیں چنانچہ خرچ کے معاملہ میں یہ گناہوں میں خرچ کرنے سے رکے رہتے ہیں، عیاشی میں یہ نہیں خرچ کرتے، شراب خواری میں یہ پیسہ نہیں برباد کرتے، نام ونمود کے لیے یہ اپنی ہتھیلیاں نہیں کھولتے اور جب طاعت میں خرچ کرنے کا وقت آتا ہے، جب غریبوں اور بیکسوں کی امداد کا وقت آتا ہے، جب اللہ کے نام پرپیسہ لگانے کی ضرورت پڑتی ہے تو اس وقت ان کا ہاتھ نہیں رکتا، اس وقت یہی سب سے بڑھ کر خرچ کرنے والے نکلتے ہیں، اور اس طرح ان کے مصارف، اسراف وبخل دونوں برائیوں سے بچ کر ٹھیک اپنے صحیح موقع اعتدال پر ہیں۔
حکمائے قدیم نے کبائر معاصی کو انسان کی تین قوتوں کا نتیجہ بتایا تھا، قوت وہمیہ، قوت غضبیہ، قوت شہویہ اور ان تینوں کے نتائج شرک، قتل وزنا کاری کی صورتوں میں ظاہرہوتے تھے، حکمائے حال کی تحقیق میں نفس انسانی کی تحلیل، عقل، ارادہ، وجذبات کے عناصر ثلثہ میں کی گئی ہے، اور ان میں جب اختلال وبدنظمی پیدا ہوگئی تو اہم گناہوں کی یہی تین صورتیں نمایاں ہوں گی۔ انتہائی بدعقلی، نافہمی وجہالت کا نتیجہ شرک ہے، قوت ارادی کا بے قابو ہوجانا، قتل وہلاکت پر ختم ہوتا ہے، جذبات پر قابو نہ رکھنے کی آخری صورت زنا کاری ہے،نسل انسانی جب کبھی اور جہاں کہیں بھی تباہ ہوئی ہے انھیں معاصی میں مبتلا ہوکر تباہ ہوئی ہے۔ عرب جاہلیت، موجودہ جاہلین فرنگ کی طرح، خصوصیت کے ساتھ انھیں بلاؤں میں مبتلا تھے۔
اعجاز یا انقلاب
’’زندہ فرقان‘‘ کا اعجاز یہ تھا کہ اس زہریلی فضا، اس وبائی ماحول میں بھی اپنے مرید، بندگان رحمن کو ان وباؤں کے اثرات سے بالکل محفوظ کردیا، کہ یہ لوگ ہیں جو نہ خدا کے ساتھ وَالَّذِیْنَ لَا یَدْعُوْنَ مَعَ اللہِ اِلہًا آخَرَ وَلاَ یَقْتُلُوْنَ النَّفْسِ الَّتِی حَرَّمَ اللہُ اِلَّا بِالْحَقِ وَلاَ یَزْنُونَ وَمَنْ یَّفْعَلْ ذلِکَ یَلْقَ اَثَامًا، یُضٰعَفْ لَہُ العَذَابُ یَوْمَ القِیمَۃِ وَیَخْلُدْ فِیْہِ مُہانًا اِلَّا مَنْ تَابَ وَاٰمَنَ وَعَمِلَ صَالِحًا فَاُولَئِکَ یُبَدِّلُ اللہُ سَئِّیاتِہِْم حَسَنتٍ وَکَانَ اللہُ غَفُورًا رَحِیْمًا۔
کسی اور معبود کو پکارتے ہیں، نہ نا حق کسی کو قتل کرتے ہیں اور نہ زنا کر تے ہیں اور جانتے رہتے ہیں کہ ان بداعمالیوںمیں پڑنے والے کیفر کردار کو پوری طر ح پہنچ کر رہیں گے، البتہ ان بد اعمالیوں کے بعد جس نے انھیں برا سمجھ کر ترک کر دیا اور نیکی کے راستہ کو پہچان لیا اور پھر اسی راہ پر چلا بھی، سو خدائے غفور ورحیم خواہ مخواہ تکلیف کسی کو نہیں دیتا، وہ ان کی موجودہ نیکیوں سے ان کی پچھلی برائیوں کو محو کردے گا، اور ایسا ہونا تو اس کے بنائے ہوے قانون فطرت کے عین مطابق ہے،اس لیے کہ جس کسی نے بدی کو بدسمجھ کر وَمَنْ تَابَ وَعَمِلَ صَالِحًا فَاِنَّہُ یَتُوْبُ اِلَی اللہِ مَتاَبًا ترک کردیا یا بالفاظ دیگر اس سے توبہ کرلی اور اس کے بعد نیک عمل کرنے لگا، تو اس کے یہ معنی ہی ہیں کہ اس نے شیطان سے اپنی دوستی قطع کر کے اللہ سے اپنا رشتہ جوڑلیا اور ٹیڑھے راستہ کو چھوڑ کر سیدھے راستہ پر پڑ گیا۔
جھوٹ اور لغو سے بچاؤ
اب تک ان کی زندگیوں کا سررشتہ جھوٹ اور ناراستی، نمود ونمائش، ریا اور بناوٹ کے دامن سے وابستہ تھا،آج یہ دیکھتے دیکھتے اتنے پاک وصاف ہوگئے ہیں کہ خود جھوٹ بولنا وَالَّذِیْنَ لاَ یَشْہَدُوْنَ الزُّوْرَ وَاِذَا مَرُّوا بِاللَّغْوِ مَرُّوا کِرَامًا اور جھوٹی کاروائیوں میں شریک ہونا تو درکنار، جھوٹی زندگی رکھنے والوں کے پاس تک نہیں پھٹکتے، جھوٹ اور تصنع ان کے شہود میں سرے سے آتا ہی نہیں اور اگر محض اتفاق سے کسی ایسے مجمع میں پھنس جاتے ہیں جو کسی لغو، لایعنی مشغلہ میں مبتلا ہوتا ہے تو یہی نہیں کہ ان کے پاک نقوس ان شیطانی ترغیبات کی جانب سے بے رغبت رہتے ہیں،بلکہ ان کے شیوہ کریمانہ اور روش بزرگانہ کو دیکھ کر خود وہ جماعت متاثر ہوجاتی ہے، وہ زمانہ گزرگیا، جب ان کے سامنے اللہ کی وَالَّذِیْنَ اِذَا ذُکِّرُوا بِایَاتِ رَبِّہِمْ لَمْ یَخِرُّوا عَلَیْہَا صُمًّا وَّعُمْیَانًا۔نشانیاں اس کی قدرت وعظمت کی نشانیاں گزرتی رہتی تھیں اور یہ بہرے اور اندھے بنے ان کی طرف سے غافل اور بے خبر رہتے تھے۔ اب ان کے کان کھل گئے ہیں ان کی چشمِ بصیرت روشن ہوچکی ہے۔ اب دنیا ان کے لیے ایک تماشاگاہ نہیں، بلکہ دارالعمل ہے۔ اب یہ نیکی اور بدی کے قانون کو،عمل وجزائے عمل کے اصول کو رب رحمن رحیم کے بتائے ہوئے سیدھے راستہ کو اچھی طرح سمجھ گئے ہیں، خود ان کی زندگیاں تو اخلاقی بیماریاں کے جراثیم سے بالکل پاک ہوچکیں۔ اس منزل سے گزرنے کے بعد قدرتاً اب ان کے د ل میں یہ تمنا غالب ہے اور یہ اسی کی دعائیں کرتے رہتے ہیں۔ ان کے قریب ترین تعلق وَالَّذِیْنَ یَقُوْلُوْنَ رَبَّنَا ہَبْ لَنَا مِنْ اَزْوَاجِنَا وَذُرِّیَاتِنَا قُرَّۃَ اَعْیُنٍ وَّاجْعَلْنَا لِلمُتَّقِیْنَ اِمَامًا۔ رکھنے والے ان کی بیویاں اور انکی اولادیں ان کی آنکھوں کی ٹھنڈک بن جائیں، خود انھیں کے رنگ میں رنگ جائیں انھیں اس درجہ بیتاب کیے ہوئے ہے کہ محض اپنی زندگی کے سدھارنے پر قانع نہیں بلکہ دوسرے متقیوں کے لیے اپنی زندگی کو بطور نمونہ پیش کرنا چاہتے ہیں۔ اللہ اکبر! کمال روحانیت کی ترقی کو دیکھنا یہی نہیں کہ خود اچھے بن گئے، یہی نہیں کہ دوسرے اچھوں کے ساتھ ہوگئے بلکہ اس مرتبہ کی تمنّا اور طلب، کہ دوسرے پاکوں اور اچھوں کی پیشوائی اور امامت حاصل ہوجائے جس کو سارے متقی مل کر اپنا امام و مقتدی تسلیم کریں، اس کے مرتبہ کمال، اس کے ارتقاء روحانیت کا کچھ ٹھکانا ہوسکتا ہے۔ اس کی زندگی جو دوسرے کاملوں کے لیے نمونہ کا کام دے سکے، خود کس درجہ کامل ہوگی؟
خزاں اور بہار
زمین خشک اور پیاسی پڑتی ہوتی ہے، بارش کے فیض سے افسردہ چمن لہلہانے لگتا ہے، مردہ کھیتی میں جان پڑجاتی ہے، سویا ہوا سبزہ جاگ اٹھتا ہے،باغ سنسان پڑا ہوتا ہے، پتّیاں مرجھا مرجھاکر گرچکتی ہیں، بہار کی ہوا چلتے ہی نئی اور ہری پتّیاں نکل آتی ہیں اور اجڑا ہوا باغ پھر سرسبز وشاداب ہوجاتا ہے، عالم پرشب کی سیاہی چھائی ہوتی ہے، ہرشے تاریکی میں گم ہوتی ہیں، صبح کے طلوع ہوتے ہی ہر طرف اُجالا پھیل جاتا ہے اور ہرذرّہ روشن ہونے لگتا ہے، ایک پاک روح دنیا میں اصلاح وتزکیہ کے لیے آتی ہے اور اپنے فیض صحبت سے بہت سے اندھوں کو بینا، بہت سے بیماورں کو تندرست اور بہت سے مردوں کو زندہ کردیتی ہے۔ کارخانہ فطرت میں اس قانون فطرت کی نظیریں برابر ملتی رہتی ہیں۔
مردوں کی مسیحائی
لیکن دنیا میں یہ انقلا ب روحانی پیدا کردینا کہ کل تک جو رہزن تھے وہ آج اچھے رہرو ہی نہیں، بلکہ بہترین رہبر بھی ہوجاہیں، کل تک جن کی زندگی فسق وفجور کی نذر تھی، آج وہ اتنے بلند ومقدس مرتبہ پر پہنچ جائیں کہ صداقت و پاکیزگی کو ان کے انتساب سے شرف ہوجائے،کل تک جو مردہ تھے، وہ آج زندہ ہی نہیں بلکہ دوسروں کو زندہ کردینے والے بن جائیں۔ ایسے آفتاب کا طلوع جو ہر ذرّہ کو آفتاب بنا دے، ایسے مسیح کا نزول جو مردہ کو مسیح بنا دے۔۔۔۔اس کی نظیر دنیا کی تاریخ میں بجز سرورعالم ﷺکے صحابیوں، بجز محمدﷺ کے غلاموں کے اور کہیں بھی مل سکتی ہے؟
نادانوں کا قول ہے کہ خاتم النّبینﷺ نے کوئی معجزہ نہیں دکھایا، حالانکہ یہ پاک زندگی شروع سے آخر تک خود ایک معجزہ تھی اور اس کا کوئی جزئیہ ایسا نہ تھا جو اپنے اندر ایک اعجازی رنگ نہ رکھتا ہو۔
اس ’’زندہ فرقان‘‘ کے ان زندہ معجزوں کے ہوتے ہوئے، کشتی نوح، گلزار خلیل، عصائے موسی، تخت سلیمانی ، حسن یوسف ، دم عیسی کسی محدود وقتی ومقامی معجزہ کی کچھ بھی ضرورت باقی رہ جاتی ہے ؟
صحابہ کرام رضی اللہ عنہم کی زندگی نہ ا س وقت راز تھی نہ آج راز ہے، ابو لہب وابو جہل اور ان کے سارے ہم نشینو ں نے اس وقت دیکھا کہ بدبودار اورپرعفونت کھاد، گملے میں پڑی اور ان کی آنکھوں کے سامنے، شاداب وخوش رنگ مہکتے ہوئے گلاب کے پھول میں تبدیل ہوگئی۔ حق کی قوّت ہر تردید وتغلیط کے خطرے سے بے پرواہ ہے، زندہ معبود کے زندہ رسولﷺ کے زندہ معجزہ کا جواب نہ اس وقت بن پڑا، نہ حق کے جھٹلانے والوں، محمدﷺ کے دشمنوں اور ابو لہب وابو جہل کے موجودہ جانشینوں میں سے کسی کے بس کی بات ہے۔
اللہ مراتب بلند کرے اکبر الہ آبادی کے، سارے مضامین نعت کا عطر ایک شعر میں کھینچ کے رکھ دیا ہے ؎
خود نہ تھے جو راہ پر اوروں کے ہادی بن گئے
کیا نظر تھی جس نے مُردوں کو مسیحا کر دیا
عبدالماجد دریابادی, Author at Bhatkallys.com
آخری تدوین: