ماتمِ اقبال - جگن ناتھ آزاد

[حسان خان]

پھر نالہ ہائے غم سے ہے لبریز دل کا ساز​

پھر ہو گیا ہے دیدۂ حیراں گہر طراز​

وہ حق شناس فلسفی و مردِ نکتہ داں​

وہ باکمال شاعر و درویشِ پاکباز​

نغمے تھے جس سخنورِ عالی دماغ کے​

مشرق میں دلپذیر تو مغرب میں جاں نواز​

تیرِ اجل نے اُس کو نشانہ بنا لیا​

تھا ہم کو آہ جس کے کمالِ سخن پہ ناز​

محفل سے آج ساقئ محفل ہی اٹھ گیا​

آزاد اب کہاں وہ شرابِ جگر گداز​

ہر بزم وقفِ نالہ و غم ہے ہزار حیف​

خوننابہ بار دیدۂ نم ہے ہزار حیف​

​

اقبال! اے جہانِ معانی کے تاجدار​

اے رومی و ثنائی و غالب کی یادگار​

معنی کو تجھ پہ فخر، تخیل کو تجھ پہ ناز​

نازاں تھا تجھ پہ مشرق و مغرب کا ہر دیار​

آتش کا سوز، گل کی مہک، برق کی تڑپ​

سو جاں سے ہو گئے تری تخئیل پہ نثار​

تو نے سخن کو زندۂ جاوید کر دیا​

تیرے نَفَس نے دی چمنِ شعر کو بہار​

دو گز زمین آہ تجھے راس آ گئی​

شہرت پہ تیری تنگ تھا دامانِ روزگار​

گو زیرِ خاک کالبدِ خاک آ گیا​

تو روح بن کے عالمِ جاں میں سما گیا​

​

اے مزرعِ سخن پہ برستے ہوئے سحاب​

اے مطلعِ وطن کے درخشندہ آفتاب​

جاں بخش تیری نظم کا ہر استعارہ ہے​

ہر لفظ بے مثال ہے ہر شعر لاجواب​

اب آ کے کون دے گا گلِ شعر کو مہک​

بخشے گا کون گوہرِ معنی کو آب و تاب​

کہتے ہیں ترجمانِ حقیقت بجا تجھے​

ہر رازِ حق تھا دیدۂ باطن پہ بے نقاب​

رتبہ تری خودی کا نہایت بلند تھا​

تجھ سے ترے خدا نے کیا بارہا خطاب​

اِس دور میں تو آگہِ رازِ قدیم تھا​

جو ہو حریفِ جلوۂ حق وہ کلیم تھا​

​

جس کی صداؤں پر ہمہ تن گوش تھے سروش​

وہ جامِ روح پرورِ عرفاں کا بادہ نوش​

جس کی نوا سے نادرِ افغاں تڑپ اٹھا​

اف ہو گیا وہ شاعرِ آتش نوا خموش​

رنگیں تھا جس کے حُسنِ تخیل سے برگِ گُل​

جس کی گرج سے موجۂ طوفاں میں تھا خروش​

سینوں میں جس نے قوتِ گفتار سے بھرا​

صہبائے بے خودی کا سرور و عمل کا جوش​

تھا جس کے سانس سانس میں میخانۂ حیات​

تربت ہے اُس کی سایۂ مسجد میں سبزپوش​

ہے خاک میں وہ عرشِ معانی ہزار حیف​

اے انقلابِ عالمِ فانی ہزار حیف​

​

(جگن ناتھ آزاد)​

۱۹۳۸ء​

 

[سید زبیر]

حسان خان !اللہ بہت خوش رکھے