جوش لاعلاج تاخیر - حضرت جوش ملیح آبادی

[حسان خان]

تربت کی تیرگی میں اجالا ہوا تو کیا​

جینے کا بعدِ مرگ سہارا ہوا تو کیا​

​

سُونا پڑا ہے سینہ جفائے دماغ سے​

اب دل کو اذنِ شرحِ تمنا ہوا تو کیا​

​

مدت سے اب تو گیسوئے دانش ہے اور دوش​

اب ابرِ زلفِ یار ہویدا ہوا تو کیا​

​

یوسف کو رنجِ ہجرِ مسلسل نے کھا لیا​

اب اہتمامِ قُربِ زلیخا ہوا تو کیا​

​

مجنوں کے ولولوں ہی پہ جب اوس پڑ چکی​

صحرا میں رقصِ ناقۂ لیلیٰ ہوا تو کیا​

​

سُن ہو چکے ہیں حرف و حکایت کے ولولے​

اب غرفۂ حریمِ سخن وا ہوا تو کیا​

​

تبدیل ہو چکا تھا جو دریا سراب میں​

اب جا کے پھر سراب سے دریا ہوا تو کیا​

​

پچھلے پہر سے مہر بہ لب ہے مریضِ غم​

اب صبحِ انبساط کا غوغا ہوا تو کیا​

​

خود درد بن چکا ہے مداوائے زندگی​

اب دردِ زندگی کا مداوا ہوا تو کیا​

​

گہوارۂ سفینہ و بازوئے ناخدا​

اب ڈوبنے کے بعد مہیا ہوا تو کیا​

​

اقرارِ دل نوازی و آہنگِ التفات​

پھر اُس نگاہِ ناز میں پیدا ہوا تو کیا​

​

جب ہو چکا شہیدِ خرد جذبۂ جنوں​

اب سوئے جیب گُل کا اشارا ہوا تو کیا​

​

اب اک ہلاکِ یاس کا ہنگامۂ نشاط​

بے مہر زندگی کو گوارا ہوا تو کیا​

​

آنکھوں کو جوش بند ہوئے دیر ہو گئی​

اب بے نقاب عارضِ سلمیٰ ہوا تو کیا​

​

(جوش ملیح آبادی)​

 

[محمد وارث]

لاجواب۔

شکریہ حسان صاحب ارسال فرمانے کیلیے

 

[نایاب]

اک اچھا انتخاب

 

[مہ جبین]

بہت خوب حسان خان

 

[فارقلیط رحمانی]

سُن ہو چکے ہیں حرف و حکایت کے ولولوے​

اب غرفۂ حریمِ سخن وا ہوا تو کیا​

​

(جوش ملیح آبادی)​

سُن ہو چکے ہیں حرف و حکایت کے ولولے​

اب غرفۂ حریمِ سخن وا ہوا تو کیا​

​

(جوش ملیح آبادی)​

 

[حسان خان]

سُن ہو چکے ہیں حرف و حکایت کے ولولے​

اب غرفۂ حریمِ سخن وا ہوا تو کیا​

​

(جوش ملیح آبادی)​

تصحیح کے لیے شکریہ