قصّہ تھا کیا عجب، میں بہت دیر تک جلا

احسن مرزا

احسن مرزا

محفلین
السلام و علیکم! ایک غزل اردو محفل پر موجود احباب کی نذر

قصّہ تھا کیا عجب، میں بہت دیر تک جلا
بے طرح، بے سبب میں بہت دیر تک جلا

ایندھن بنا کے تیرے تصور کو ہجر میں
مثلِ چراغِ شب میں بہت دیر تک جلا

آتش غمِ فراق کی پنہاں تھی قلب میں
اک یہ بھی تھا سبب میں بہت دیر تک جلا

جلتا رہا تھا شب کے اندھیروں میں بھی مگر
بعدِ زوالِ شب میں بہت دیر تک جلا

یوں بھی ستا رہی تھی لبوں کی تپش مجھے
رکھ کر لبوں پہ لب میں بہت دیر تک جلا

منزل دُھواں، ارادے دُھواں، حسرتیں دُھواں
ہوکر بھی جاں بلب میں بہت دیر تک جلا

اک ساعتِ وصال ملی جس کے واسطے
اے دیدہٗ طرب میں بہت دیر تک جلا
 
طارق شاہ

طارق شاہ

محفلین
احسن مرزا نے کہا:
السلام و علیکم! ایک غزل اردو محفل پر موجود احباب کی نذر

احسن مرزا صاحب
وعلیکم سلام

آپ میں ایک اچھے شاعر کی تمام خوبیاں ہیں ایک اچھی کوشش پر میری بہت سی داد
قبول کیجئے ، ایک مخلصانہ اور برادرانہ رائے سمجھ کر میری اس تحریر کو دیکھیں
ضروری نہیں ہے اس سے اتفاق کرنا، مگر سنجیدگی سے دیکھنے میں بھی کوئی حرج نہیں

تشکّر۔
۔۔۔۔۔۔۔۔۔۔۔۔۔۔۔۔۔

قصّہ تھا کیا عجب، میں بہت دیر تک جلا
بے طرح، بے سبب میں بہت دیر تک جلا

بے طرح ٹھیک نہیں، اسے یوں کردیں :

قصّہ تھا اِک عجب، میں بہت دیر تک جلا
الفت میں بے سبب میں بہت دیر تک جلا
۔۔۔۔۔۔۔۔۔۔۔۔۔

ایندھن بنا کے تیرے تصوّر کو ہجر میں
مثلِ چراغِ شب میں بہت دیر تک جلا
واہ واہ، کیا ہی اچھا ہے
۔۔۔۔۔۔۔۔۔۔۔۔۔

آتش غمِ فراق کی پنہاں تھی قلب میں
اک یہ بھی تھا سبب میں بہت دیر تک جلا
غم فراق میں تو جلد جل بجھ جاتا یا مر جاتا ہے، اسے یوں کردیں کہ:

اُمّیدِ وصل دِل میں تھی ہجر و فراق میں
اک یہ بھی تھا سبب میں بہت دیر تک جلا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جلتا رہا تھا شب کے اندھیروں میں بھی مگر
بعد زوالِ شب میں بہت دیر تک جلا

بعدِ زوالِ شب یہاں کچھ جچا نہیں، زوال بتدریج کم ہونے کے زمرے میں زیادہ سوٹ کرتا ہے
کچھ یوں کردیں گے تو بہتر ہوگا:

محدود میرا جلنا اندھیروں ہی تک نہ تھا !
ہر اختمامِ شب میں بہت دیر تک جلا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یوں بھی ستا رہی تھی لبوں کی تپش مجھے
رکھ کر لبوں پہ لب میں بہت دیر تک جلا

اسے کچھ یوں کہ:

بامِ عروج پر تھا تصوّر یہ رات بھر !
رکھ کر لبوں پہ لب میں بہت دیر تک جلا

۔۔۔۔۔۔۔۔۔۔۔۔۔۔۔۔۔۔۔۔

منزل دُھواں، ارادے دُھواں، حسرتیں دُھواں
ہوکر بھی جاں بلب میں بہت دیر تک جلا

کو یوں :

منزل دُھواں تھی پھر بھی ملن کی اِک آس تھی
ہوکر بھی جاں بلب میں بہت دیر تک جلا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اک ساعتِ وصال ملی جس کے واسطے
اے دیدہٗ طرب میں بہت دیر تک جلا

اور اس کو کچھ ایسا :)
سوزش غضب تھی، حُسن کے ساعت کی دید میں !
میں حدّتِ طرب میں بہت دیر تک جلا

بہت خوش رہیں اور صاحب لکھتے رہیں انداز اور خیال بے حد دلکش ہے آپ کا
بہت سی دعائیں اور نیک خواہشات آپ کے لئے

مزید نمائش کے لیے کلک کریں۔۔۔
 
آخری تدوین:
جواب دینے کے لیے داخل ہوں یا شمولیت اختیار کریں۔
Top