غزل

[دائم]

قسمت سے تو افکارِ نياگانِ كہن مانگ
اخلاص و عمل ، مہر و محبّت کی لگن مانگ

آشوب ہے جو تیرے نہاں خانۂِ دل میں
ہنگامۂِ خفتہ کو جگا ، تابِ سخن مانگ

مہتاب سے ، روشن ہے جو سیمائے افق پر
غافل کو جگا دے جو ، کوئی ایسی کرن مانگ

آہوئے حرم ! کاخِ فرنگى كو عبث جان
تو خوگرِ صحرا ہے ، وہی دشتِ ختن مانگ

آئینِ مسلَّم ہو جہاں عشقِ بلا خيز
اے حسنِ جہاں تاب ! کوئی ایسا وطن مانگ

اے کشتۂِ عریانئِ تہذیبِ فرنگی !
جا ! قعرِ مذلت میں اترنے کو کفن مانگ

"شاہاں چہ عجب گر بنوازند گدا را"
دائمؔ شہِ کونین کے قدموں میں عدن مانگ

غلام مصطفیٰ دائم اعوان