غزل : کسی ملال میں غلطاں خلل کی بے خبری - م م مغل

[فرحان محمد خان]

غزل
کسی ملال میں غلطاں خلل کی بے خبری
گھڑی ملاتے ہوئے ایک پل کی بے خبری

ہمارا حال بھی آکاس بیل جیسا ہے
ہمارے آج سے لپٹی ہے کل کی بے خبری

ہمیں خبر ہے کے دریا سراب ہوتے ہیں
مگر سراب میں رہتی ہے جل کی بے خبری

کسے بتائیے بے لمس خستگی کا جواز
کسے سنائیے جا کر ازل کی بے خبری

امڈ رہا تھا سرِ چشم مصلحت کا ہجوم
سمیٹتے ہوئے شانوں کو ڈھلکی بے خبری

بس ایک خواب میں تکیے سے ہم کنارا ہوا
کہ نیند میں بھی رہی ہلکی ہلکی بے خبری

خبر کے باب میں اک دشتِ ہجر ہے آباد
زقند بھرتی ہوئی اک غزل کی بے خبری

پلٹ رہی تھی دبے پاؤں بے دلی بے سُود
پکارتی ہی رہی بے بدل کی بے خبری

بدن پہ دو ہی خراشیں ہیں مستقل محمودؔ
یہ نامِ عمر تحیّر ، اجل کی بے خبری​

م م مغل​