نصیر الدین نصیر عظمت عقلِ انسانی از نصیر الدین نصیر گولڑوی

عظمت عقلِ انسانی
اے خرد! صبح ادب، فخرِ سخن ، نازِ قلم
غازۂِ چہرۂ ِ قرطاس و نگارِ عالم
فخرِ اسکندر و دارا و کے خسرو جم
ناقد و نکتہ و ر و مُدْرِکِ اسرارِ قِدَم
شوق کو رنگ دیا ،ذوق نکھارا تونے
گیسوئے لیلیِ فطرت کو سنوارا تونے​
تیرے دم سے ہے گلستانِ تخیل میں بہار
تیرے جلوے سے ہوئے دشت و بیاباں گلزار
تجھ سے ہے زمزمہ ونغمہ و گلبانگ ہزار
تو نہ ہو جلوہ فروزاں تو ہے انساں بیکار​
کون ایسا ہے کہ جس پر ترا احسان نہیں
تجھ سے پھر جائے جو انسان ،وہ انسان نہیں​
علمِ دیں ،علمِ یقیں،علمِ فلک،علمِ کتاب
موجِ گل، موجِ صبا، موجِ طرب ،موجِ شراب
ذوقِ دل،ذوقِ نظر،ذوقِ طلب،ذوقِ شباب
حسنِ ظن،حسنِ گماں،حسنِ بیاں،حسنِ خطاب​
اِن کے اسرار بتائے تو بتائے تونے​
یہ حجابات اٹھائے تو اٹھائے تونے​
تیراظاہر تیرے باطن کی طرح ہے بے داغ
جستجو سے تری ملتا ہے حقیقت کا سراغ
تو جلاتی ہے جہالت کے اندھیروں میں چراغ
تیرا ممنونِ عنایات ہے انساں کا دماغ​
رازِ سربستہ بہ صد ناز و ادا کھول دیئے​
تونے انسان پہ دَر ہائے بقا کھول دیئے​
بزمِ غم،بزمِ طرب،بزمِ فنا،بزمِ بقا
رنگِ گل ،رنگِ چمن،رنگِ وفا ،رنگِ جفا
صدقِ دل،صدقِ طلب،صدقِ نظر،صدقِ دعا
تیرے ہی دم سے اِن الفاظ کو مفہوم ملا​
حضرتِ حق میں بہ جز تیرے نیازیں بے سُود​
تو نہ یاور ہو تو واعظ کی نمازیں بے سود​
شاعر و فلسفی و شاہ و حکیم و قاضی
حافظ و محتسب و میر و خطیب و قاری
مطرب و ساقی و سلطان و گدا و صوفی
مفتی و حاکم و استاد و ادیب و ہادی
سب تیرے لطف و عنایات سے فرزانے ہیں​
تو اگر اِن سے بچھڑ جائے ،یہ دیوانے ہیں

یہ ترنم ،یہ تکلم ،یہ تبسم،یہ سرور
یہ تجسس ،یہ تَفُحِص ،یہ تفکر،یہ شعور
یہ فلک بوس عمارات،یہ ایواں ،یہ قُصور
یہ فصاحت ،یہ بلاغت،یہ قوافی،یہ بحور​
بابِ ادراک ہر انسان پہ وا کرتی ہے​
قلب کو دولتِ احساس عطا کرتی ہے​
جھولیاں گوہرِ اسرار سے بھر دیتی ہے
ذہن کو راستہ،دیوار کو در دیتی ہے
طائرِ فکر کو الفاظ کے پَر دیتی ہے
تو غنی بندۂِ محتاج کو کردیتی ہے​
تو تفکر ہے،تدبر ہے،ذہانت تو ہے
ہم کو خالق سے ملی ہے جو امانت ،تو ہے​

تو زماں اور مکان ،گردش دوراں تو ہے
دیدۂِ مہرِ ضیاء بار میں رَخشَاں تو ہے
زیورِ نازِ بتاں ،زینتِ خوباں تو ہے
جام لبریز میں رقصندہ و رقصاں تو ہے
چرغ درباں ہے ترے در پہ زمیں جھکتی ہے
تیری سرکار میں شاہوں کی جبیں جھکتی ہے
تجھ سے ہی اہل تدبر کی فراست کا بھرم
تیرے ہی دم سے دارائیِ ارباب قلم
صفحۂِ دہر پہ ہیں تیری عنایات رقم
عالمِ غیب کاجُنباں ہے ترے سر پہ علم
بات بنتی ہے ترے فیض سے انسانوں کی
سانس رکتی ہے ترے نام سے طوفانوں کی
تجھ سے ملتی ہے اَساَطِیر سے انسان کو نجات
تو عطا کرتی ہے گنجینۂِ اسرار و نکات
پردۂِ غیب تو ہے اک تیرے خیمے کی قنات
تجھ سے کھلتا ہے درِ بارگہہِ ذات و صفات
کوئی مشکل ہو تو آسان بنادیتی ہے​
حد یہ ہے ،کفر کو ایمان بنادیتی ہے
غالب و مومن و فردوسی و میر و سعدی
حافظ و رومی و عطار و جنید و شبلی
خسرو جامی و خیام و انیس و عرفی
آدم و یونس و یحییٰ و نبی اور ولی
اِ ن کی گفتار کی پرواز کی سرحد تو ہے
غایتِ جنبشِ لب ہائے محمد تو ہے(ﷺ)​
ملکِ انصاف و صداقت میں ہے شاہی تیری
ہر عدالت میں ہے مقبول گواہی تیری
سردی و گرمی وشیرینی و تلخی وعسل
گلشن و وادی و صحرا و تل و دشت و جبل
تو ہے تہذیب و تمدن میں ترقی کا عمل
مشتری، زہرہ و ناہید و ثریا و زحل
اُٹھ گیا پردۂِ تاریک شب آسا تجھ سے
ذہنِ انسان پہ ہوا نور کا تڑکا تجھ سے
ہیں تیرے تابع فرماں حرکات و سکنات
تیرے ہی دم سے شعورِ حسنات و برکات
تجھ سے مضبوط اساسِ در و دیوار حیات
منحصر تیری بلندی پہ عروجِ درجات
تیری قوت کی ادا اہلِ نظر جان گئے
تیرا لوہا مَلک و ارض و سما مان گئے
ہے عباراتِ پریشاں کی تجھی سے تطبیق
تیری عفت سے مزین ہے کلامِ صدیق
تجھ سے بے بہرہ اگر ہو تو ہے انساں زندیق
قصرِ اخلاق ہے تو اور بِنائے تخلیق
تجھ سے ساغر مئے افکار کے ہم بھرتے ہیں
عرش والے تیرے اجلال کا دم بھرتے ہیں
تیری تحریک کے محتاج ہیں عرفان شعور
تیرے پردوں میں ہے سازِ طربِ جم مستور
تیری شادابی ِ افکار سے انساں مسرور
تیری ٹھوکر میں ہے جامِ جم و تاجِ فغفور
کس کی آہٹ تھی ،جو یہ دشت و جبل کانپ گئے
کس کی تکبیر تھی،کیوں لات و ہُبَل کانپ گئے
دشنہ و ناوک و تیر و تبر وتیغ و قلم
نیرہ و خنجر و گُرز و طبل و جاہ و حشم
منجنیق و زِرہ و جوشن و شمشیر و عَلم
ترکش و خود و خدنگ و سپر و ماتم و غم
اِن سے تو نے صفِ پیکار میں جب کام لیا
ضرب وہ آئی کہ دشمن نے جگر تھا م لیا
برق نے پائی ہے تھوڑی سی روانی تیری
قُمریوں میں روشِ زمزمہ خوانی تیری
معتبر تا بہ فلک سِحر بیانی تیری
ہم تو کیا بات فرشتوں نے بھی تیری مانی
ساری دنیا میں جہالت کا بسیرا ہوجائے
تو جو اٹھ جائے تو عالم میں اندھیرا ہوجائے
نورِ مہتاب ہے،دریا کی روانی تو ہے
شوق کا حُسن ہے ،جذبوں کی جوانی تو ہے
عزت و عظمتِ انساں کی نشانی تو ہے
سچ ہے،تعمیر و ترقی کی کہانی تو ہے
عقل پلے ہو ،یہی ایک ہے بس کام کی بات یہی ایمان کا خلاصہ یہی اسلام کی بات​
 

نایاب

لائبریرین
واہہہہہہہہہہہ
بہت خوب عارفانہ شراکت
بابا جی آج وجد میں آئے لگتے ہیں ۔
ماشاءاللہ
ہم مسکینوں کو بھی دعاؤں میں یاد رکھیئے گا
 
Top