عشق دی اگ وچ سڑدے رہ گے

[نوید ناظم]

عشق دی اگ وچ سڑدے رہ گے
اندروں اندری مَردے رہ گے

جاون والے ٹر گے چھڈ کے
بھاویں مِنتاں کردے رہ گے

ہنجواں ساڈے حال چا کھولے
کہڑی گل دے پردے رہ گے

آس دا پنچھی کولوں اُڈیا
ایس نوں پھڑدے پھڑدے رہ گے

دل نے ساڈی ہِک نہ مَنّی
ساری عمراں لڑدے رہ گے

یاد تیری دا سوہنا نگ سی
ہجر انگوٹھی جڑدے رہ گے

پِیراں والی گل وی مک گئی
نان حلیم تے زردے رہ گے

سوہنیا بھر بھڑولے اپنے
اسیں تے ہاواں بھردے رہ گے

وچ صحراواں لنگ گئی ساری
ہُن تے سُفنے گھر دے رہ گے
۔۔۔۔۔۔
نوید ناظم