شاہ نیاز عاشقِ زار ہوں میں طالبِ آرام نہیں - حضرت شاہ نیاز بریلوی

[حسان خان]

عاشقِ زار ہوں میں طالبِ آرام نہیں​

ننگ و ناموس سے کچھ اپنے تئیں کام نہیں​

​

بے سروپائی سے عشاق کو خطرہ کیا ہے​

اثرِ عشق ہے یہ گردشِ ایام نہیں​

​

نشۂ چشم سے ہوں ساقیِ توحید کے مست​

احتیاج اپنے تئیں ظرفِ مئے و جام نہیں​

​

بوالہوس پانوں نہ رکھیو کبھی اس راہ کے بیچ​

کوچۂ عشق ہے یہ رہگذرِ عام نہیں​

​

بے نہایت ہے کہ پایا نہیں جسکا پایاں​

جس جگہ پہنچئے آغاز ہے انجام نہیں​

​

عالمِ عشق کی دنیا ہی نرالی دیکھی​

سحر و شام وہاں یہ سحر و شام نہیں​

​

زاہدا حال مرا دیکھ کے حیراں کیوں ہے​

مشربِ کفر ہے یہ ملتِ اسلام نہیں​

​

ساقیِ مست کے دیدار کا سرشار ہوں میں​

اِس لئے دل کو تمنائے مئے و جام نہیں​

​

عار کیا ہے تجھے لوگوں کی ملامت سے نیاز​

عاشقوں میں تو اکیلا ہی تو بدنام نہیں​

​

(حضرت شاہ نیاز بریلوی)​