جوش طوفان بن - حضرت جوش ملیح آبادی

[حسان خان]

اے طائرِ لب بستہ، آ، مرغِ خوش الحاں بن​

یہ مردہ دلی تا کے؟ اٹھ، جانِ گلستاں بن​

​

تقلید کے دیوانے، تقلید گدائی ہے​

تحقیقی ہے سلطانی، ہم پایۂ سلطاں بن​

​

اے پیرئ افسردہ، آ، درسِ جوانی لے​

اے ملتِ مفتوحہ، اٹھ، فاتحِ دوراں بن​

​

بستر پہ ہے اک دنیا، بیمار ہے اک عالم​

آ، زخم کا مرہم بن، آ درد کا درماں بن​

​

منعم سے ہو روگرداں، مفلس سے محبت کر​

اے مشعلۂ بستاں قندیلِ بیاباں بن​

​

نظارگئ گردوں، گیتی کو بنا مرکز​

اے صیدِ الوہیت، وابستۂ انساں بن​

​

اے روحِ سکوں خستہ، اے موجۂ یخ بستہ​

بڑھتی ہوئی ہلچل بن، بپھرا ہو طوفاں بن​

​

اے عقل، تدبر کے سائے میں نظر ہو جا​

اے علم، تفکر کے آغوش میں عرفاں بن​

​

(جوش ملیح آبادی)​

۱۹۴۴ء​

 

[عمران اسلم]

واہ صاحب۔
کمال کی شراکت ہے۔ بہت شکریہ

 

[مہ جبین]

اے عقل، تدبر کے سائے میں نظر ہو جا
اے علم، تفکر کے آغوش میں عرفاں بن
بہت خوب حسان خان

 

[سید زبیر]

زبردست انتخاب ۔ ہر شعر بے مثال
اے عقل، تدبر کے سائے میں نظر ہو جا
اے علم، تفکر کے آغوش میں عرفاں بن