صدائے درویش - امجد حیدر آبادی

[کاشفی]

صدائے درویش​

(ابولاعظم سید احمد حسین امجد حیدرآبادی)​

​

اس رنج کی دنیا میں جامِ طرب افزا دے​

اس میکدہء لاَ میں، اِک ساغر الاّ دے​

​

اے فضل و کرم والے! محتاج کو دِلوادے​

امید کے بندے کو محروم نہ پلٹا دے​

​

دے اے مرے مولا دے، دے اے مرے داتا دے​

​

اِس اپنے بھکاری پر، اے شاہ کرم فرما​

آیا ہے ترے در پر گمراہ، کرم فرما​

​

مایوسی کی حالت میں ناگاہ، کرم فرما​

اللہ! کرم فرما لِلّہ، کرم فرما​

​

دے اے مرے مولا دے، دے اے مرے داتا دے​

​

دُوری سے تری تھک کر، جی اپنا نہ ہاروں گا​

افلاک کی چوٹی سے تاروں کو اُتاروں گا​

​

بگڑی ہوئی قسمت کو سنواروں گا​

سَو مرتبہ چیخوں گا، سَو بار پُکاروں گا​

​

دے اے مرے مولا دے، دے اے مرے داتا دے​

​

اس جسم کے جوہر کو عُریانی سے زینت دے​

دستِ دل سائل میں، دامانِ محبت دے​

​

کچھ غم کی مسّرت دے، کچھ درد کی لذّت دے​

ایمان کی عزّت دے، توحید کی دولت دے​

​

دے اے مرے مولا دے، دے اے مرے داتا دے​

​

کب تک تری صورت کو یہ دیدہء تر، ترسے​

دیکھیں مری کھیتی میں کب ابرِ کرم برسے​

​

اُمید بہت کچھ ہے امجد کو ترے در سے​

دامانِ ہوس بھردے مقصود کے گوہر سے​

​

دے اے مرے مولا دے، دے اے مرے داتا دے​

 

[محمد وارث]

بہت شکریہ کاشفی صاحب شیئر کرنے کیلیے۔