آتش شوقِ وصلت میں ہے شغلِ اشک افشانی مجھے - خواجہ حیدر علی آتش

[حسان خان]

شوقِ وصلت میں ہے شغلِ اشک افشانی مجھے​

ہجر میں کرنا پڑا آخر لہو پانی مجھے​

​

یاد میں آئینۂ رخ کے ہے حیرانی مجھے​

زلف کے سودے میں رہتی ہے پریشانی مجھے​

​

تنگ کرتا ہے گریباں کٹنے لگتا ہے گلا​

موسمِ گل کی جو یاد آتی ہے عریانی مجھے​

​

ہوں وہ دیوانہ کہ اپنا نام رٹنے کے لیے​

اک پری نے دی ہے تسبیحِ سلیمانی مجھے​

​

ایک حرف اُس کی عبارت کا پڑھا جاتا نہیں​

لکھ دیا کس خط میں ہے یہ خطِ پیشانی مجھے​

​

چشمہ ہائے چشم میں گریے سے ہے دریا کا جوش​

غوطے کھلواتا ہے سیلِ اشک کا پانی مجھے​

​

خواب سے بیدار وہ خورشید رو آ کر کرے​

ایسی اے آنکھو دکھاؤ صبحِ نورانی مجھے​

​

ذبح ہی کرتے گلے لگنے جو دیتی تھی نہ شرم​

عیدِ قرباں تھی سمجھتے آپ قربانی مجھے​

​

عشق میرا مہرباں ہے حُسن بندہ یار کا​

آئینہ سا رخ ملا ہے اُن کو حیرانی مجھے​

​

بوسہ لیتا ہوں دہانِ ناپدیدِ یار کے​

آشکارا ہو گیا ہے کنجِ پنہانی مجھے​

​

کون سے گلشن میں بلبل چہچہے کرتا نہیں​

یار کے کوچے میں زیبا ہے غزل خوانی مجھے​

​

ساقیانِ ماہ پیکر پر کیا کرتا ہوں حکم​

میکدے میں عالمِ مستی ہے سلطانی مجھے​

​

خشک رہتا ہے بہت شوقِ شہادت سے گلا​

ہو سکے تو ہمدمو خنجر کا دو پانی مجھے​

​

خاک میں ملوا رہا سودائے زلفِ یار ہے​

مثلِ گردِ راہ رہتی ہے پریشانی مجھے​

​

اے خیالِ یار کرتا ہوں ریاضت سے صفا​

خانۂ دل میں ہے کرنی تیری مہمانی مجھے​

​

حسن کے جلوے سے اُس رخ کا اشارہ ہے یہی​

کافری زلفوں کو زیبا ہے مسلمانی مجھے​

​

شہرِ خوباں میں نہیں آتش مروت کا رواج​

تشنہ لب مر جاؤں تو ممکن نہ ہو پانی مجھے​

​

(خواجہ حیدر علی آتش)​

 

[طارق شاہ]

ایک حرف اُس کی عبارت کا پڑھا جاتا نہیں​

لکھ دیا کِس خط میں ہے یہ خطِ ّ پیشانی مجھے​

​

شہرِ خُوباں میں نہیں آتش مُروّت کا رِواج​

تشنہ لب مرجاؤں تو ممکن نہ ہو پانی مجھے​

کیا کہنے
بہت خوب انتخاب
تشکّر شیئر کرنے پر
بہت خوش رہیں

 

[مدیحہ گیلانی]

شہرِ خوباں میں نہیں آتش مروت کا رواج​

تشنہ لب مر جاؤں تو ممکن نہ ہو پانی مجھے
واہ واہ مکمل غزل ہی خوبصورت ہے مگر مقطع کا تو جواب نہیں ۔
جیتے رہیں بیٹا آباد رہیں ​