شاخ پہ چڑیا گاتی ہے ۔ ناظر صدیقی

[سین خے]

شاخ پہ چڑیا گاتی ہے
جو کچھ ہے لمحاتی ہے ​

پلکیں بھیگی رہتی ہیں
دل کی فضا جذباتی ہے ​

بات کروں یا شعر کہوں
ایک سی خوشبو آتی ہے ​

شہر میں ہوں اور تنہا ہوں
رنگ مرا قصباتی ہے ​

فکر ہے مجھ کو اپنی ہی
غم بھی میرا ذاتی ہے ​

حکم نہ دو بے داری کا
نیند ہی کس کو آتی ہے ​

لمس انا پر اتنا ناز
خوشبو ہے اڑ جاتی ہے ​

شمع کی صورت قسمت بھی
جلتے ہی بجھ جاتی ہے ​

قید قفس میں اب ناظرؔ
روح بہت گھبراتی ہے

(ناظر صدیقی)​