جوش ساری دنیا ہے ایک پردۂ راز

[حسان خان]

ساری دنیا ہے ایک پردۂ راز​

اُف رے تیرے حجاب کے انداز​

​

موت کو اہلِ دل سمجھتے ہیں​

زندگانئ عشق کا آغاز​

​

مر کے پایا شہید کا رتبہ​

میری اس زندگی کی عمر دراز​

​

کوئی آیا، تری جھلک دیکھی​

کوئی بولا، سنی تری آواز​

​

ہم سے کیا پوچھتے ہو ہم کیا ہیں؟​

"اک بیاباں میں گم شدہ آواز"​

​

تیرے انوار سے لبالب ہے​

دل کا سب سے عمیق گوشۂ راز​

​

آ رہی ہے صدائے ہاتفِ غیب​

جوش ہمتائے حافظِ شیراز​

​

(جوش ملیح آبادی)​