محسن نقوی زندگی جب بھٹک گئی ہوگی

[طارق شاہ]

غزل ​

محسن نقوی​

​

زندگی جب بھٹک گئی ہوگی ​

تابہ حّدِ فلک گئی ہوگی​

​

راکھ کے ڈھیر میں دُھواں کیسا؟ ​

آگ پھر سے بھڑک گئی ہوگی ​

​

موت کا ساتھ چھوڑنے کے لئے ​

زندگی دُور تک گئی ہوگی ​

​

برق گرنے سے گھر کے جلنے تک ​

ساری بستی چمک گئی ہوگی​

​

دل کو جینے کا ڈھب تو آتا تھا ​

دل کی دھڑکن ہی تھک گئی ہوگی​

​

آبلہ پا جدھر گئے ہوں گے ​

راہ پھولوں سے ڈھک گئی ہوگی​

​

اُس کے قدموں کی چاپ سے محسن ​

دل کی دھرتی دھڑک گئی ہوگی ​

محسن نقوی​

​