رکھتے ہیں عشقِ چشم و رخِ گلعذار ہم - مولانا فصیح اللہ وفا لکھنوی

[حسان خان]

رکھتے ہیں عشقِ چشم و رخِ گلعذار ہم​

ہیں مبتلائے گردشِ لیل و نہار ہم​

​

گر بے وفا سمجھتے تمہیں اے نگار ہم​

بھولے سے بھی لگاتے نہ دل زینہار ہم​

​

پیری میں اُس جوان سے ہیں ہمکنار ہم​

اپنی خزاں کی دیکھ رہے ہیں بہار ہم​

​

آئینہ وار شیخ و برہمن سے صاف ہیں​

رکھتے نہیں ہیں دل میں کسی سے غبار ہم​

​

معلوم کیا ہوں خنجرِ برّاں کی تیزیاں​

رکھتے ہیں عشقِ ابروئے خمدارِ یار ہم​

​

یہ شوقِ مے کشی ہے کہ فصلِ بہار میں​

میخانے روز جاتے ہیں بے اختیار ہم​

​

؟؟؟؟؟؟؟؟؟؟؟؟؟؟؟؟؟؟؟؟؟​

اپنا کسی کو پاتے نہیں غمگسار ہم​

​

آئے ہیں فاتحے کو وہ ہمراہ غیر کے​

تڑپیں نہ کس طرح سے میانِ مزار ہم​

​

بالیں پہ وہ مسیح ہے دم بھر ذرا ٹھہر​

کہتے ہیں موت سے یہ دمِ احتضار ہم​

​

عالم کو زلزلے کا گماں کس طرح نہ ہو​

اے یار تیرے ہجر میں ہیں بے قرار ہم​

​

تربت میں چین آئے گا کیونکر پسِ فنا​

جاتے ہیں ساتھ لے کے دلِ بے قرار ہم​

​

اُس ماہ نے چھپایا ہے رخ کو نقاب میں​

بجلی کی طرح کیوں نہ ہوں پھر بے قرار ہم​

​

باغِ جہاں میں جب ہوئی آمد بہار کی​

دامان و جیب کرنے لگے تار تار ہم​

​

اے موت کیوں نہ آئی شبِ ہجرِ یار میں​

کرتے رہے کمال ترا انتظار ہم​

​

احبابِ رفتگاں ہمیں یاد آتے ہیں وفا​

جس وقت دیکھتے ہیں کسی کا مزار ہم​

​

(مولانا فصیح اللہ وفا لکھنوی)​

 

[زبیر مرزا]

واہ جناب بہت خُوب

 

[طارق شاہ]

آئینہ وار شیخ و برہمن سے صاف ہیں
رکھتے نہیں ہیں دل میں کسی سے غبار ہم
کیا کہنے صاحب !
تشکّر شیئر کرنے پر