ربیع الاوّل کے حوالے سے اشعار

[جاسمن]

ازراہِ کرم صرف ربیع الاوّل کے حوالے سے اشعار شریک کیجیے گا۔
تاکہ ربیع الاوّل کے سلسلے کی تقاریب میں بھی پڑھے جا سکیں۔

 

[جاسمن]

وہ پتھروں کا زمانہ تھا لوگ پتھر تھے
پھر اک روز ہوئی ابتدا محبت کی

 

[جاسمن]

نصیب چمکے ہیں فرشیوں کے
کہ عرش کے چاند آ رہے ہیں

جھلک سے جن کی فلک ہے روشن
وہ شمس تشریف لا رہے ہیں

 

[جاسمن]

کتنا خوش بخت ہے یہ ماہِ ربیع الاول
اس میں چمکا مہِ بطحا بہ جمالِ اکمل

محمد عبد الحمید صدیقی نظرؔ لکھنوی

 

[جاسمن]

جس سہانی گھڑی چمکا طیبہ کا چاند
اس دل افروز ساعت پہ لاکھوں سلام

 

[محمد عبدالرؤوف]

پیر نصیرالدین نصیر گولڑوی صاحب کا کلام۔


تمہیں مل گئ اِک خدائی حلیمہ
کہ ہے گود میں مُصطفائی حلیمہ

کہ کم ہے ! تمہاری بڑھائی حلیمہ
زمانے کے لب پر ہے مائی حلیمہ

بہت لوریاں دیں مہِ آمنہ ﷺ کو
کہاں تک ہے تیری رسائی حلیمہ

میسّر نہیں ہے کسی کو جہاں میں
وہ دولت ! جو تم نے کمائی حلیمہ

لیا گود میں جب شفیعُ الورا ﷺ کو
بڑے فخر سے مسکرائی حلیمہ

رسولِ خدا ﷺ اور آغوش اُن کی
وہ خدمت کے لمحے وہ دائی حلیمہ

دوعالم کی دولت مجھے مل گئی ہے
اُنہیں لے کے یہ گنگنائی حلیمہ

جو تقدیر تم کو عطاء کی خداﷻ نے
کسی اور نے کب وہ پائی حلیمہ

اُسے اپنی آغوش میں تم لیے ہو
کہ ! شاہی ہے جس کی گدائی حلیمہ

وہ عظمت ملی ہے کہ اللّٰہ اکبر !
مقدّر کہ تیری دُہائی حلیمہ

کسی کی ضیاؤں سے جگ مگ ہے عالم
مبارک ! مہِ مُصطفائی حلیمہ

نصیرؔ اپنی قسمت پہ نازاں ہو جس دم
ملے تیرے در کی گدائی حلیمہ

 

[الشفاء]

حضور آپ آئے
تو دل جگمگائے

 

[الشفاء]

ہواؤں میں جذبات ہیں مرحبا کے، فضاؤں میں نغمات صل علیٰ کے
درودوں کے گجرے سلاموں کے تحفے، غلامو سجاؤ حضور آ گئے ہیں