حسان خان
لائبریرین
اے مری تخئیل بن جا کائناتِ ہست و بود
ہاں پہن اے جذبۂ ایجاد تشریفِ وجود
اے عدم اٹھ گامزن ہو شکلِ موجودات میں
اے مرے اجمال آ جا رنگِ تفصیلات میں
ہاں مجسم حُسن ہو جا اے مرے دل کی ترنگ
اے نویلی سادگی بن جا نگارِ آب و رنگ
محملِ اسماء میں آ جا، لیلیِٰ وجہِ جمیل
پردۂ اشکال میں چھپ جا مری روحِ جلیل
حلقۂ امکاں میں در آ اک نئے انداز سے
اے مری ذات، اپنے دامن کو جھٹک کر ناز سے
اے مرے ہیجان بن جا کارگاہِ این و آں
معرضِ ہستی میں آ جا، اے زمین، اے آسماں
-------
اے زمیں آباد ہو جا آشنائے راز سے
گونج اٹھ اے آسماں، انسان کی آواز سے
اے خموشی بڑھ، رکابِ نطقِ آدم تھامنے
اے پہاڑو سر جھکا دو، آدمی کے سامنے
اپنی تمکیں سے خبردار اے عروسِ بحر و بر
ہو رہا ہے خاک پر اسرارِ حق کا پردہ در
ہاں ابل پڑ سینۂ انگور سے موجِ شراب
شاہدِ آفاق کے چہرے سے اٹھ جا اے نقاب
اے سمندر ہاں ادب کے ساتھ شورِ پیچ و تاب
پاک انساں کے قدم لے اے دہکتے آفتاب
ہاں اٹھ اے آفاق، استقبالِ آدم کے لیے
سروقد ہو اے عناصر، خیر مقدم کے لیے
سختیوں کو ترک کر دو، نرمیوں سے کام لو
ابر و برف و باد، طوفانوں کی باگیں تھام لو
پیشوائی کو ادب سے پیشوائی کو بڑھو
اے کڑکتی بجلیو، اے گھڑگھڑاتے بادلو
اے شگوفو مسکراؤ، آبشارو گیت گاؤ
گنگناؤ اے ہواؤ، اے پرندہ چہچاؤ
بخشتا ہوں لے تجھے روحِ عظیم و نفسِ پاک
ہاں کلاہِ فخر کج کر اے جواں اقبال خاک
ہوش میں آ اے غنودہ فرشِ خاکی ہوش میں
کچھ خبر ہے عرش آتا ہے تری آغوش میں
(جوش ملیح آبادی)
