تھر تھر کنبدے پر چڑیاں دے

[عبدالقیوم چوہدری]

تھر تھر کنبدے پر چڑیاں دے
ربا لاہ دے ڈر چڑیاں دے

تیرے پکیاں مَحلاں کھوہ لئے
نکے نکے گھر چڑیاں دے

پپل، ٹالہی، بوڑھاں پُٹ کے
سِر نہ ننگے کر چڑیاں دے

اِل تے کاں دے رولے وچ وی
حق جاندے نیں مر چڑیاں دے

شِکری رُت اے ویکھیں کدھرے
لیکھ نا جاون ہر چڑیاں دے

موسم بھاویں جو وی ہووے
رہندے پلُو تر چڑیاں دے

سُکھ جے وس وچ ہوون سندھوؔ
ویڑھے دیواں بھر چڑیاں دے
۔۔۔
ارشاد سندھوؔ​