تضمین بر "اج سِک مِتراں دی"

اوہدی دل نوں تانگھ بتیری اے
جہدی ازلوں شان اُچیری اے
ربّا وصل دے وچ کیہ دیری اے
اج سک متراں دی ودھیری اے
کیوں دلڑی اُداس گھنیری اے
لوں لوں وچ شوق چنگیری اے

اج نیناں لایاں کیوں جھڑیاں

فرقت دی رات لمبیری اے
جُھلَی غم دی لال ہنیری اے
کیہ رحمت دے وچ دیری اے
اج سک متراں دی ودھیری اے
کیوں دلڑی اُداس گھنیری اے
لوں لوں وچ شوق چنگیری اے

اج نیناں لایاں کیوں جھڑیاں

اوہدے ہتھ مُہار زمانی اے
اوہدی دو جگ تے سلطانی اے
ایتھے گم عقلِ انسانی اے
مکھ چند بدر شعشانی اے
متھے چمکے لاٹ نورانی اے
کالی زلف تے اکھ مستانی اے

مخمور اَکھیں ہن مدھ بھریاں

اوہنوں ہستی دا عنوان آکھاں
رب سچے دی بُرہان آکھاں
یاں اکھیاں دا قرآن آکھاں
اس صورت نوں میں جان آکھاں
جاناں کہ جانِ جہان آکھاں
سچ آکھاں تے ربّ دی شان آکھاں

جس شان تھیں شاناں سب بنیاں

قامت موزوں ، تے ٹور حسیں
مازاغ نظر ، والشّمس جبیں
جنہوں دیکھیاں اوے رب تے یقیں
اِیہہ صورت ہے بے صُورت تِھیں
بے صُورت ظاہر صُورت تِھیں
بے رنگ دِسے اِس مُورت تِھیں

وِچ وحدت پُھٹیاں جد گھڑیاں

ایہدے حسن دا پرتو شمس و قمر
ایہدے متوالے بو بکر و عمر
ایہا رکھسی لاج لہد اندر
ایہا صورت شالا پیش نظر
رہے وقت نزع تے روزِ حشر
وچ قبر تے پُل تِھیں ہوسی گزر

سب کھوٹیاں تِھیسن تد کھریاں

بھرو سِکدیاں اکھیاں دا دامن
میرا اجڑے نہ آساں دا گلشن
کرو کرم طُفیلِ اویسِ قرن
لاہو مُکھ توں مُخطَّط بُردِ یمن
مَن بھانوری جھلک دکھاؤ سجن
اوہا مِٹھیاں گالیں الاؤ مٹھن

جو حمرا وادی سَن کریاں

سُتّے بھاگ اکھیں دے جگاؤ ڈھولن
مُکھ عاشقاں نوں دِکھلاؤ ڈھولن
پھیرا رحمت والا پاؤ ڈھولن
حُجرے تِھیں مسجد آؤ ڈھولن
نُوری جھات دے کارن سارے سِکن
دو جگ اکھیاں رَہ دا فرش کرن

سب اِنس و ملک حُوراں پریاں

اِنہاں جالیاں دے ول آندیاں تے
اِنہاں مُڑ مُڑ جھاتیاں پاندیاں تے
اِنہاں جھڑکاں، ماراں کھاندیاں تے
اِنہاں سکدیاں تے کُر لاندیاں تے
لکھ واری صدقے جاندیاں تے
اِنہاں بردیاں مفت وکاندیاں تے

شالا وت آون اوہ گھڑیاں

کیہ جِن و بشر ، کیہ شاہ و گدا
ڈِٹھی جس وی نصیرٌ اوہ شانِ خدا
اُڈّے ہوش تے مونہوں بول اُٹھیا
سُبحان اللہ ما اجمَلَکَ
ما احسَنَکَ ما اکمَلَکَ
کِتھے مہرٌِ علی کِتھے تیری ثنا

گستاخ اکھیں کِتھے جا اَڑیاں

کتاب :- دِیں ھَمہ اُوست
شاعر:- پیر سید نصیر الدین نصیر گیلانی​
 

الف نظامی

لائبریرین
اوہنوں ہستی دا عنوان آکھاں
رب سچے دی بُرہان آکھاں
یاں اکھیاں دا قرآن آکھاں
اس صورت نوں میں جان آکھاں
جانان کہ جانِ جہان آکھاں
سچ آکھاں تے ربّ دی شان آکھاں
جس شان تھیں شاناں سب بنیاں

 
Top