شہزاد احمد تصویر کے خطوط نگاہوں سے ہٹ گئے - شہزاد احمد

[معاویہ وقاص]

تصویر کے خطوط نگاہوں سے ہٹ گئے​

میں جن کو چومتا تھا وہ کاغذ تو پھٹ گئے​

​

انسان اپنی شکل کو پہچانتا نہیں​

آآ کے آئینوں سے پرندے چمٹ گئے​

​

بنتی رہی وہ ایک سویٹر کو مدتوں​

چپ چاپ اس کے کتنے شب و روز کٹ گئے​

​

کس شوق سے وہ دیکھ رہے تھے ہجوم کو​

جب میں نظر پڑا تو دریچے سے ہٹ گئے​

​

آخر کسی کشش نے انھیں کھینچ ہی لیا​

دروازے تک نہ آئے تھے آکر پلٹ گئے​

​

پت جھڑ میں اک کلی بھی میسر نہ آسکی​

پس سگرٹوں کی راکھ سے گلدان اَٹ گئے​

​

بدلا ہوا دکھائی دیا آسماں کا رنگ​

ذرے زمیں سے، شاخ سے پتے لپٹ گئے​

​

اتنا بھی وقت کب تھا کہ پتوار تھام لیں​

ایسی چلی ہوا کہ سفینے اُلٹ گئے​

​

پابندیاں تو صرف لگی تھیں زبان پر​

محسوس یہ ہوا کہ مرے ہاتھ کٹ گئے​

​

کچھ سرد تھی ہوا بھی نظر کے دیار کی​

کچھ ہم بھی اپنے خول کے اندر سمٹ گئے​

​

ہر سُو دکھائی دیتے ہیں نیزہ بدست لوگ​

اے کاخِ ظلم تیرے طرف دار گھٹ گئے​

​

شہزاد پھر سے رخت سفر باندھ لیجیے​

رستے بھی سوکھ جائیں گے، بادل تو چھٹ گئے​

شہزاد احمد​

 

[محسن وقار علی]

اتنا بھی وقت کب تھا کہ پتوار تھام لیں​

ایسی چلی ہوا کہ سفینے اُلٹ گئے​

پابندیاں تو صرف لگی تھیں زبان پر​

محسوس یہ ہوا کہ مرے ہاتھ کٹ گئے​

کچھ سرد تھی ہوا بھی نظر کے دیار کی​

کچھ ہم بھی اپنے خول کے اندر سمٹ گئے​

​

 

[نایاب]

بہت خوب شراکت

 

[فیصل عزیز]

بہت ہی عمدہ انتخاب۔۔۔۔۔ شہزاد احمد مرحوم کا
ان کی ایک غزل آپ کی نظر



یہ سوچ کر کہ تیری جبیں پر نہ بل پڑے
بس دور ہی سے دیکھ لیا اور چل پڑے

دل میں پھر اِک کسک سی اٹھی مدتوں کے بعد
اِک عمر سے رکے ہوئے آنسو نکل پڑے

سینے میں بے قرار ہیں مردہ محبتیں
ممکن ہے یہ چراغ کبھی خود ہی جل پڑے

اے دل تجھے بدلتی ہوئی رُت سے کیا ملا
پودوں میں پھول اور درختوں میں پھل پڑے

اب کس کے انتظار میں جاگیں تمام شب
وہ ساتھ ہو تو نیند میں کیسے خلل پڑے

شہزاد دل کو ضبط کا یارا نہیں رہا
نکلا جو ماہتاب سمندر اچھل پڑے