بیکل اُتساہی --- حُسن جلوَہ نہیں عشق کا حاصل تنہا

[طارق شاہ]

غزلِ​

بیکل اُتساہی​

​

حُسن جلوَہ نہیں عشق کا حاصل تنہا​

کتنے جلوؤں کو سمیٹے ہے مِرا دل تنہا​

​

کارواں چھُوٹ گیا رات کے سنّاٹے میں​

رہ گئی ساتھ مِرے حسرتِ منزل تنہا​

​

عزْم مُحکم ہو تو ہوتی ہیں بَلائیں پسپا​

کتنے طُوفاں کو پلٹ دیتا ہے ساحل تنہا​

​

حُسن ہنگامۂ بازار میں مصروف رہا​

عشق تو چُپ ہے سجائے ہُوئے محفل تنہا​

​

سب کے ہونٹوں پہ تبسّم تھا مِرے قتل کے بعد​

جانے کیا سوچ کے روتا رہا قاتل تنہا​

​

لوگ تو ہوگئے بیکل! غمِ دَوراں کا شکار​

رہ گیا میں ہی زمانے کے مقابل تنہا​

​

بیکل اتساہی​