جوش برسات کی پہلی گھٹا - جوش ملیح آبادی

[حسان خان]

کیا جوانی ہے فضا میں، مرحبا صد مرحبا​

چل رہی ہے روح کو چھوتی ہوئی ٹھنڈی ہوا​

آ رہی ہے دور سے کافر پپیہے کی صدا​

حُسن اٹھا ہے خاک سے انگڑائیاں لیتا ہوا​

جھوم کر برسی ہے کیا برسات کی پہلی گھٹا​

​

آرزو میں ہے تلاطم، جوش ارمانوں میں ہے​

حسرتوں میں ولولے ہیں، تازگی جانوں میں ہے​

نوجوانی کا تبسم سرد میدانوں میں ہے​

روشنی ہے دشت میں، خوشبو بیابانوں میں ہے​

جھوم کر برسی ہے کیا برسات کی پہلی گھٹا​

​

مطربوں نے ساحلوں پر جا کے چھیڑے ہیں ستار​

ہَل دھرے کاندھوں پہ ہنستے جا رہے ہیں کاشتکار​

مست ہے جنگل میں چرواہا، چمن میں جوئے بار​

گا رہا ہے ناخدا دریا کے سینے پر ملار​

جھوم کر برسی ہے کیا برسات کی پہلی گھٹا​

​

بستیوں میں نَے ہے گرمِ زمزمہ، جنگل میں بانس​

جی اٹھی ہے دھوپ کے مارے ہوئے میداں کی گھانس​

لے رہے ہیں پھول اطمینان سے باغوں میں سانس​

ابر کے ناخن نے دل سے کھینچ لی گرمی کی پھانس​

جھوم کر برسی ہے کیا برسات کی پہلی گھٹا​

​

ماہ پیکر لڑکیاں رنگینیوں پر تُل گئیں​

رنگ کی پُڑیاں ہزروں ایک دن میں کھل گئیں​

لی جو گہری سانس دل کی کلفتیں سب دھل گئیں​

گرد کچھ اس طرح سے بیٹھی کہ آنکھیں کھل گئیں​

جھوم کر برسی ہے کیا برسات کی پہلی گھٹا​

​

بھر دیے پانی نے جل تھل، ندیاں بہنے لگیں​

چھوڑ کر شانوں پہ زلفیں، مسکرائے نازنیں​

آج ہے غرقِ سفیدی، سرخ تھی کل جو زمیں​

سرد پانی چوس کر ذروں نے آنکھیں بند کیں​

جھوم کر برسی ہے کیا برسات کی پہلی گھٹا​

​

چھا گئی لو، دفعۃً آموں کے باغوں پر بہار​

اٹھ رہی ہے سوندھی سوندھی سی شمیمِ خوشگوار​

شاخ پر کوئل غزلخواں ہے، لبِ جو مے گسار​

گا رہے ہیں رکھ کے ڈولی نیم کے نیچے کہار​

جھوم کر برسی ہے کیا برسات کی پہلی گھٹا​

​

پڑ رہا ہے تیز پانی، پک رہی ہیں پوریاں​

رقص کرتا جا رہا ہے موجِ باراں میں دھواں​

مہوشوں کی زیب و زینت، الحفیظ و الاماں​

ہر کلائی میں نظر آتی ہیں دھانی چوڑیاں​

جھوم کر برسی ہے کیا برسات کی پہلی گھٹا​

​

ابر کے سیلاب میں ڈوبا ہوا ہے جزو و کل​

خار کی نبضوں میں بھی دوڑا ہوا ہے خونِ گل​

صحن میں پانی ہے اور پانی میں ہے بچوں کا غل​

اک طرف لکڑی کی کشتی، اک طرف مٹی کا پل​

جھوم کر برسی ہے کیا برسات کی پہلی گھٹا​

​

باہمی آویزشیں غم خواریاں سی بن گئیں​

بے زری کی کلفتیں زرداریاں سی بن گئیں​

بھر گیا پانی، زمیں پر دھاریاں سی بن گئیں​

جا بجا مٹی جو سمٹی کیاریاں سی بن گئیں​

جھوم کر برسی ہے کیا برسات کی پہلی گھٹا​

​

زندگی کی سرد نبضوں میں حرارت آ گئی​

منعموں میں خُلق، کانٹوں میں نزاکت آ گئی​

ہجر کے افسردہ چہروں پر بشاشت آ گئی​

حد ہے خوش چشموں کی آنکھوں میں مروت آ گئی​

جھوم کر برسی ہے کیا برسات کی پہلی گھٹا​

​

(جوش ملیح آبادی)​

۱۹۲۳ء​

​