جوش اے شیخِ شہر! - جوش ملیح آبادی

[حسان خان]

اے شیخِ شہر، خرقۂ سالوس اتار دے​

دل کو بھی مثلِ کاکلِ شب گوں سنوار دے​

​

رہتا ہے اوجِ نطق پہ جس ماہ وش کا نام​

اُس ماہ وش کو خلوتِ دل میں بھی بار دے​

​

ہر دل پہ کَندہ کرتا ہے جو نقشِ دل نشیں​

خود اپنی لوحِ جاں پہ بھی وہ نقش ابھار دے​

​

جس درسِ خاص کی ہیں مریدوں پہ بارشیں​

اپنے کو بھی وہ درسِ ملائک شکار دے​

​

تا چند دوسروں کے نکھارا کرے گا رنگ؟​

اپنا بھی رنگ، بہرِ خدا، اب نکھار دے​

​

اِس طرّۂ کلاہ کی تزئین تا کجا؟​

باطن کے تاج کو بھی دُرِ شاہوار دے​

​

جس کو لُٹا رہا ہے زمانے پہ بے دریغ​

اپنے کو بھی وہ دولتِ عرفانِ یار دے​

​

برسیں گے پھول جنتِ سلطاں پہ تا بہ کے؟​

دشتِ گدائے راہ کو بھی برگ و بار دے​

​

تا چند منعموں کے لیے مژدۂ چمن؟​

بے زر کو بھی پیامِ نسیمِ بہار دے​

​

کیوں جوش الجھ رہا ہے عبث شیخِ شہر سے​

یہ نشہ وہ نہیں جسے تُرشی اتار دے​

​

(جوش ملیح آبادی)​

 

[نایاب]

واہہہہہہہہہہہہہہہہہہہہہ
یہ نشہ وہ نہیں جسے ترشی اتار دے ۔۔۔۔۔۔۔۔
لاجواب شراکت

 

[محمد وارث]

بہت خوب۔ شکریہ جناب ارسال فرمانے کیلیے