اک پنجابی لوک گیت طرز تے لکھن دی کوشش کیتی اے، پڑھ کے رائے ضرور دینا جی

[محمد اظہر نذیر]

چوڑئیے نی چوڑئیے، کھسماں نوں کھانئیے
پھوڑی تیری پا دیواں، ٹٹ مر جانئیے

فایدہ کی اے تیرا مینوں، چھن چھنکانی آں
اک واری تک لوئے، ترلے میں پانی آں
سڑ دیاں سکھیاں نے، توں وی سڑ جانئیے
چوڑئیے نی چوڑئیے، کھسماں نوں کھانئیے

نتھ وڈے نگ والی، سنارے توں لئیائی سی
چاندی دی پجیب، پانڈے ویچ منگائی سی
ایڈا میں شنگھار کیتا، پھائے چڑھ جانئیے
چوڑئیے نی چوڑئیے، کھسماں نوں کھانئیے

مہندی نال ناں اودا، ہتھاں اُتے لکھیا
دل وچ چور سارے، پنڈ نوں اے وکھیا
اوہ ای جے نا ویکھے، توں راہ پھڑ رانئیے
چوڑئیے نی چوڑئیے، کھسماں نوں کھانئیے

اودے کولوں لنگدی کھنگورا وی سی ماریا
کہنی وی سی ٹکرائی، چنی نوں اُتاریا
ابا میرا تک لیندا، منوں ڈر پانئیے
چوڑئیے نی چوڑئیے، کھسماں نوں کھانئیے​

 

[محمد اظہر نذیر]

پنجابی محفل دے ساتھیو،
السلام و علیکم،
پنجاب دے حسن وچ اک وڈا حصہ میری دھرتی دے لوک گیتاں دا اے، لوک گیت ماضی وچ لکھے گئے نظر آندے نے، پر موجودہ دور وچ شائد میری نظر توں نئی گزرے
مین کوشش کیتی اے، محفل دے اساتذہ توں درخواست کرنا کہ کوءی غلطی ہووے تے رستہ ضرور وخانہ
ہسدے وسدے روو جی
اظہر

 

[طالوت]

اظہر بھرا پڑھ کے مزا آیا ۔ تکنیکی طور تے ایدے چے کوئی خامی ہووے تے میں دسن جوگا نئیں ۔ پرا ک گل پوچھنی اے کی پنجابی شاعری وچ اصلاحی یا انقلابی شاعری کیوں نظر نئیں آوندی؟
وسلام

 

[فرخ منظور]

اظہر صاحب تہانوں پتا اے لوگ گیت کنوں کہندے نیں؟

 

[محمد اظہر نذیر]

بڑی میربانی طالوت جی،
اصلاحی یا انقلابی شاعری ، شاعری دے اصول تے قائدیاں تے بہت زیادہ عبور منگدی اے، جیہڑہ میرے کول نئی، لیکن تواڈی گل بجا اے
میں انشا اللہ کوشش کراں گا

 

[محمد اظہر نذیر]

اظہر صاحب تہانوں پتا اے لوگ گیت کنوں کہندے نیں؟

جناب سخنور صاحب،
میری ناقص معلومات دے مطابق، مین کجھ عرصہ بہلے اک کتاب پڑھی سی جدے وچ پوٹوھار توں تعلق رکھدے لوک گیت لکھے ہوئے سن، ہن او کتاب میرے کول نہیں ، لیکن میں سمجھدا واں کہ کسے علاقے دی ثقافت توں تعلق رکھدے گیت ہی لوک گیت کہواندے نے، اگر میری معلومات غلط اے تے میربانی کر کے درست صورتہال دسو
بڑی میربانی

 

[محمد اظہر نذیر]

what i mean to say is to revamp those old songs
انگریزی لکھن دی معذرت لیکن سمجھ نئیں آیا کہ پنجابی وچ کداں لکھاں

 

[محمد اظہر نذیر]

کافی نیٹ کھول کے اک لفظ لبھیا اے شائد انج کہنا تھیک ہوے گا
لوک گیت دی طرذ اُتے لکھیا گیت
میربانی کر کے ضرور جواب دینا کہ ٹھیک اے کہ نئیں

 

[دوست]

لو جی اے تے نئیں پتا کہ کہیڑا گیت اے۔ پر ایدھے وچ آخری کجھ سطراں وچ اردو دے ہک دو لفظ دکھے نیں۔ پر ردھم چنگا لگیا اے۔ بطور لسانیات دا طالب علم مینوں تے ایناں ای پتا ہے۔ پنجابی وچ لکھدے رہنا، چھڈ نا جانا۔

 

[محمود احمد غزنوی]

میرے خیال اچ لوک گیت دی ایہو ای تعریف ایہہ کہ اوہدا کوئی اکّ مصنّف نئیں ہوندا۔۔۔اوہ معاشرے دے کئی افراد دی زباناں تو لنگدا ہویا کئی شکلاں بدلدا ہویا آخر اک صورت وچ قرار پھڑ لیندا ایہہ۔۔۔اور اوہ جس شکل یا دھن وچ آخر کار ڈھل جاندا ایہہ شائد اسّے نوں لوک گیت کہواں گے۔۔۔واللہ اعلم

 

[فرخ منظور]

محمود صاحب نے بالکل درست فرمایا اے۔ فوک گیت اونہاں نوں آکھدے نیں جیہڑے صدیاں یا کئی عشریاں تو اک رہتل دے وچ گائے جاندے ہون تے سب توں اہم گل کہ اوس گیت دے نہ لکھاری دا پتا ہووے اور نہ ہی اے پتا ہووے کہ ایہدی طرز کنے بنائی سی ۔ لہٰذا اظہر صاحب تسی گیت تے لکھ سکدے ہو لیکن لوگ گیت تسی ہزار کوشش وی کرو تے نہیں لکھ سکدے ۔ ایس لئے اے صرف گیت اے۔ اور گیت وی ہے یا نہیں اے آسی صاحب بہتر دس سکدے نیں۔
دوجی گل کہ مینوں کج لفظاں کے مطلب دی سمجھ نہیں آئی ہو سکے تو اونہاں دا مطلب دس دیو ۔
پھوڑی؟
فایدہ کی اے تیرا مینوں، چھن چھنکانی آں
ایدے وچ آں دا کی مطلب اے؟

دوجا مینوں بحر دا وی مسئلہ لگدا اے۔ بہتر طور تے آسی صاحب تہانوں دس سکدے نیں۔

 

[محمد اظہر نذیر]

لو جی اے تے نئیں پتا کہ کہیڑا گیت اے۔ پر ایدھے وچ آخری کجھ سطراں وچ اردو دے ہک دو لفظ دکھے نیں۔ پر ردھم چنگا لگیا اے۔ بطور لسانیات دا طالب علم مینوں تے ایناں ای پتا ہے۔ پنجابی وچ لکھدے رہنا، چھڈ نا جانا۔

جناب کجھ نشاندہی کر دیندے تے میربانی ہندی

 

[محمد اظہر نذیر]

میرے خیال اچ لوک گیت دی ایہو ای تعریف ایہہ کہ اوہدا کوئی اکّ مصنّف نئیں ہوندا۔۔۔اوہ معاشرے دے کئی افراد دی زباناں تو لنگدا ہویا کئی شکلاں بدلدا ہویا آخر اک صورت وچ قرار پھڑ لیندا ایہہ۔۔۔اور اوہ جس شکل یا دھن وچ آخر کار ڈھل جاندا ایہہ شائد اسّے نوں لوک گیت کہواں گے۔۔۔واللہ اعلم

بڑی میربانی جناب میرے علم وچ اضافہ ہویا

 

[محمد اظہر نذیر]

محمود صاحب نے بالکل درست فرمایا اے۔ فوک گیت اونہاں نوں آکھدے نیں جیہڑے صدیاں یا کئی عشریاں تو اک رہتل دے وچ گائے جاندے ہون تے سب توں اہم گل کہ اوس گیت دے نہ لکھاری دا پتا ہووے اور نہ ہی اے پتا ہووے کہ ایہدی طرز کنے بنائی سی ۔ لہٰذا اظہر صاحب تسی گیت تے لکھ سکدے ہو لیکن لوگ گیت تسی ہزار کوشش وی کرو تے نہیں لکھ سکدے ۔ ایس لئے اے صرف گیت اے۔ اور گیت وی ہے یا نہیں اے آسی صاحب بہتر دس سکدے نیں۔
دوجی گل کہ مینوں کج لفظاں کے مطلب دی سمجھ نہیں آئی ہو سکے تو اونہاں دا مطلب دس دیو ۔
پھوڑی؟
فایدہ کی اے تیرا مینوں، چھن چھنکانی آں
ایدے وچ آں دا کی مطلب اے؟

دوجا مینوں بحر دا وی مسئلہ لگدا اے۔ بہتر طور تے آسی صاحب تہانوں دس سکدے نیں۔

سخنور جی میرے علم وچ خاطرخواہ اضافہ ہویا اج،
جیہڑا سوال تسی پچھیا اے ''آں '' جیویں کردی آں، کہندی آں، رہندی آں۔ ساڈے پنجاب وچ بولیا جاندا اے او ہی لکھن دی کوشش کیتی اے، کیا اے ٹھیک نئی؟
بڑی میربانی جناب

 

[فرخ منظور]

شکریہ اظہر صاحب۔ ہن اے دسو کہ ایس پورے مصرع دا تسی کی مطلب لے رئے او؟ نالے "پھوڑی" دا مطلب وی تسی نہیں دسیا اوہدا مطلب وی دسو ۔

 

[محمد اظہر نذیر]

شکریہ اظہر صاحب۔ ہن اے دسو کہ ایس پورے مصرع دا تسی کی مطلب لے رئے او؟ نالے "پھوڑی" دا مطلب وی تسی نہیں دسیا اوہدا مطلب وی دسو ۔

جناب سخنور صاحب،
پھوڑی ساڈے پاسے اوس ویلے پاندے نے جدوں کوئی مر جاندا اے، جیہڑی صف لوکاں دے بین واسطے وچھائی جاندی اے اونوں کہندے نے


فایدہ کی اے تیرا مینوں، چھن چھنکانی آں
ایدا مطلب اے وے کی اے چوڑئے میں تینوں کنا وی چھنکا لواں میرا سوہنا میرے ول ویخھدا ای نئیں ایس لئی منوں تیرا کوءی فائدہ نئیں گا

 

[محمد اظہر نذیر]

السلام و علیکم،
جناب آسی صاحب سے گزارش کی کچھ فرصت ہو تو رہ نمائی فرما دیں
جزاک اللہ خیر

 

[محمد اظہر نذیر]

اگر کوئی صاحب علم اسے سنوارنے میں مدد کر سکتا ہے تو درخواست ہے
بڑی نوازش ہو گی
اظہر

 

[محمد اظہر نذیر]

چوڑئیے نی چوڑئیے، کھسماں کھانئیے
پھوڑی تیری پا دیواں، ٹٹ مر جانئیے

فایدہ کی اے تیرا مینوں، چھن چھنکاواں
اک واری تک لوئے، ترلے میں پاواں
سڑ دیاں سکھیاں ، توں وی سڑ جانئیے
چوڑئیے نی چوڑئیے، کھسماں کھانئیے

نتھ سوہنی نگ والی نک وچ پائی سی
پیر دی پنجیب میں منگ لیائی سی
ایڈا سی شنگھار ، پھائے چڑھ جانئیے
چوڑئیے نی چوڑئیے، کھسماں کھانئیے

اودا ناں مہندی نال ہتھ اُتے لکھاں
چوری جیویں کردی، ساریاں نوں دکھاں
اوہ ای جے نا ویکھے، راہ پھڑ رانئیے
چوڑئیے نی چوڑئیے، کھسماں کھانئیے

اودے کولوں لنگدی کھنگدی میں جاواں
چنی لہرا کے تے، مکھڑا لکاواں
پھڑی نا میں جاواں، منوں ڈر پانئیے
چوڑئیے نی چوڑئیے، کھسماں کھانئیے​

 

[ماظق]

پھوڑی یا پھوڑا دی بالکل ٹھیک دس پائی جے
ایتھے ای کدھرے افضل ساحر دی شاعری ویکھی سی۔۔اوہدا اک نمونہ حاضر اے۔
جندے نیں تیرا کارج کُوڑا
سر تے شگناں والیاں گھڑیاں
آن وچھایا ای پھُوڑا