حسان خان
لائبریرین
فسوں بدوش ہے کالی گھٹا اندھیری رات
تمام ارض و سما کے چراغ ہیں خاموش
فضاؤں پر نہ تلاطم، نہ بجلیاں، نہ گرج
زمین پر نہ تبسم، نہ زمزمے، نہ خروش
فرازِ عرش پہ سنجیدگی، دعا بر لب
بساطِ خاک پہ دہشت، جلال در آغوش
دواں ہے لشکرِ سود و زیاں، عناں بہ عناں
رواں ہے قافلۂ کرب و کیف، دوش بدوش
دماغ و دل سے بیک وقت چھیڑ کرتی ہے
ہوائے نرم، باندازۂ پیامِ سروش
جو سامنے ہے تو بس اک حقیقتِ کبریٰ
تمام ارض و سما کا طلسم ہے روپوش
فریب، غمزۂ اشکال و عشوۂ اسماء
نقاب اٹھائے ہوئے دشت میں ہے جلوہ فروش
بربِ کعبہ کہ جوہر ہے کوئی شے نہ عرض
خدا گواہ کہ فردا ہے کوئی چیز نہ دوش
زمانہ دست و گریباں ہے اصطلاحوں پر
کسے خبر کہ ہے ہر اصطلاح، کفر بدوش
بس اک وجود میں گم ہے تمام موجودات
تمام عالمِ مستی، تمام عالمِ ہوش
یہ رازِ دوست ہے اے جوشِ نامآل اندیش
سیاہ کار! خدا کے لیے خموش، خموش!
(جوش ملیح آبادی)
