انجام دل غم کش کوئی عشق میں کیا جانے (میر)

[منیب فیض]

انجام دل غم کش کوئی عشق میں کیا جانے
کیا جانیے کیا ہو گا آخر کو خدا جانے

واں آرسی ہے وہ ہے یاں سنگ ہے چھاتی ہے
گذرے ہے جو کچھ ہم پر سو اس کی بلا جانے

ناصح کو خبر کیا ہے لذت سے غم دل کی
ہے حق بہ طرف اس کے چکھے تو مزہ جانے

میں خط جبیں اپنا یارو کسے دکھلاؤں
قسمت کے لکھے کے تیں یاں کون مٹا جانے

بے طاقتی دل نے ہم کو نہ کیا رسوا
ہے عشق سزا اس کو جو کوئی چھپا جانے

اس مرتبہ ناسازی نبھتی ہے دلا کوئی
کچھ خُلق بھی پیدا کر تا خلق بھلا جانے

لے جایئے میرؔ اس کے دروازے کی مٹی بھی
اس درد محبت کی جو کوئی دوا جانے