احتکار کو سمجھنے کی اشد ضرورت

پروفیسر شوکت اللہ شوکت نے 'آپ کے کالم' کی ذیل میں اس موضوع کا آغاز کیا، ‏جولائی 20, 2020

  1. پروفیسر شوکت اللہ شوکت

    پروفیسر شوکت اللہ شوکت محفلین

    مراسلے:
    308
    جھنڈا:
    Pakistan
    موڈ:
    Cool
    احتکار کے لغوی معنی گراں فروشی کی نیت سے غلّہ کی ذخیرہ اندوزی ہے۔ شریعت کی اصطلاح میں اس کا مفہوم ہر ایسی چیز جو غذائی ضرورت میں کام آتی ہو، اسے مہنگا بیچنے کے لئے روک رکھنا ہے۔ اس بات کو آسان الفاظ میں یوں بیان کیا جاسکتا ہے کہ کوئی شخص غلّہ وغیرہ اس نیت سے خریدے اور اپنے پاس روک رکھے کہ جب گراں بازاری کا وقت آئے تو اسے بیچوں گا ،احتکار کہلاتا ہے ۔اس کو عرفِ عام میں مہنگائی کا نام بھی دیا جاتا ہے۔ پس احتکار( ذخیرہ اندوزی ) سے مراد یہ ہے۔ ’’کوئی شخص اس نیت سے غلّہ یا کوئی اور جنس بڑی مقدار میں اس لئے خریدے یا جمع کرے کہ جب مارکیٹ میں اس کی کمی واقع ہو اور خریدار یا ضرورت مند مجبور ہوکر اُس کی مقررہ قیمت پر خریدیں ۔البتہ اگر کسی چیز کے ذخیرہ کرنے سے مارکیٹ میں قلت اور مہنگائی میں اضافہ نہ ہوتا ہو تو یہ ذخیرہ اندوزی نہیں کہلاتی ہے ۔‘‘ ( ہدایہ کتاب البیوع ) ۔ ارشاد نبوی ﷺ ہے۔ ’’ جس نے ذخیرہ اندوزی اس ارادہ سے کی کہ وہ اس طرح مسلمانوں پر اس چیز کی قیمت چڑھائے وہ خطا کار ہے۔ ‘‘حضرت عمر ؓ سے روایت ہے کہ آپ ﷺ نے فرمایا ۔ ’’ تاجر کو ( اﷲ تعالیٰ کی طرف سے ) رزق دیا جاتا ہے اور ذخیرہ اندوزی کرنے والا لعنتی ہے۔ ‘‘ (مشکوٰۃ )۔اس حدیث پاک ﷺ سے یہ مراد ہے کہ جو شخص اپنا مال رائج نرخ پر فروخت کرے ، یعنی اس کی نیت میں ذخیرہ اندوزی نہ ہو تو اسے اﷲ تعالیٰ کی طرف سے رزق دیا جاتا ہے اور اس میں برکت ڈال دی جاتی ہے اس کے خلاف جو شخص ذخیرہ اندوزی سے لوگوں کو پریشان کرتا ہے وہ ملعون ٹھہرتا ہے اور خیر و بھلائی سے محروم رہتا ہے۔ ارشاد ایزدی ہے۔ ’’ اور تمہارا رزق اور جس چیز کا تم سے وعدہ کیا گیا ہے آسمان میں (یعنی اﷲ تعالیٰ کے ذمہ میں ) ہے ۔ ‘‘ ( سورۃ الذریات : 22 )۔ سورۃ السباء میں ارشاد ہوتا ہے۔ ’’ اے نبی صلی اﷲ علیہ وسلم ان سے فرماؤ ،بے شک میرا رب رزق وسیع کرتا ہے جس کے لئے چاہے اور تنگی فراہم کرتا ہے لیکن بہت لوگ اس حقیقت کو نہیں جانتے۔ ‘‘ ( سورۃ السباء : 36 )۔ قرآن ِ مجید میں جگہ جگہ یہ ذکر ملتا ہے کہ رزق کی ذمہ دار اﷲ تعالیٰ کی ذات خود ہے۔ ہمیں اﷲ تعالیٰ اور خاتم النبیین حضرت محمد ﷺ کے ان احکامات کو اپنے ذہنوں میں پختہ بیٹھنا اور ان پر سختی سے عمل پیرا ہونا ہوگا کہ احتکار اور دیگر ناجائز ذرائع سے نفع کمانے سے اجتناب کرناہے۔ حضرت عمر بن خطاب رضی اﷲ تعالیٰ عنہ کہتے ہیں کہ میں نے آپ ﷺ کو یہ فرماتے سنا ہے ۔’’ جو شخص غلّہ روک کر گراں نرخ پر مسلمانوں کے ہاتھ فروخت کرتا ہے اﷲ تعالیٰ اسے جذام و افلاس میں مبتلا کر دیتا ہے۔ ‘‘ ( رواہ ابن ماجہ ، مشکوٰۃ )۔ اس حدیث مبارکہ ﷺ سے مراد یہ ہے کہ جو شخص مخلوق ِ خدا اور بالخصوص مسلمانوں کو تکلیف و نقصان دیتا ہے ۔ اﷲ تعالیٰ اسے جسمانی اور مالی بلاؤں میں مبتلا کر دیتا ہے۔ موجودہ وبائی تناظر میں دیکھا جائے تو ہم نے سب سے پہلے فیس ماسک او ر ہینڈ سینیٹائزر اس نیت سے ذخیرہ کیے کہ جب کورونا وباء بڑھے گی تو انہیں زیادہ داموں فروخت کیا جائے گا۔ اس کے بعد چینی ، آٹا ، گھی ، پیٹرول ، ادویات وغیرہ کو مہنگے دواموں فروخت کے لئے ذخیرہ کیا گیا اور آج ہم دیکھ رہے ہیں کہ مارکیٹ میں ان اشیاء کی مصنوعی قلت پیدا ہو گئی ہے اور ضرورت مند انہیں ذخیرہ اندزوں سے اُن کے مقررکردہ نرخوں پر خرید رہے ہیں۔ مثال کے طور پر پانچ روپے والا فیس ماسک بیس سے تیس روپے ، دوسو پچاس روپے والا این 95 ماسک ایک ہزار روپے ، ہینڈ سینیٹائزر کی قیمت آسمان سے باتیں کررہی ہے ، کلوروکین کی دوائی تین ہزار روپے ، سنامکی فی کلو چوبیس سو روپے ، بیس کلو آٹے کا تھیلا ایک ہزار روپے سے اُوپر ، چینی پچاس روپے سے پچھیاسی روپے فی کلو ، گھی مہنگا ، پیٹرول سستا ہوا تو غائب اور اَب پچیس روپے کے پَر لگ جانے سے نمودار اور ایکٹیمرا انجیکشن کی فی ملی گرام کے حساب سے ہزاروں اور لاکھوں روپوں قیمت وغیرہ میں دستیاب اور فروخت ہو رہے ہیں۔اَب سکول ، کالج اور یونیورسٹیاں کو کھولنے کے لئے ایس اوپیزتیار کی جارہی ہیں جن میں این 95 فیس ماسک اور ٹمپریچر گن لازمی ہوگی۔ اس خبر کے ساتھ ہی آٹھ سو روپے والی ٹمپریچر گن مارکیٹ میں بیس ہزار روپے میں بکنے لگی ہے۔ اسلام نے ایسے تجاروں کو جو ذخیرہ اندوزی کرکے مصنوعی قلت پیدا کریں اور پھر رسد و طلب میں عدم توازن پیدا کرکے مارکیٹ میں اپنا مال اپنی من مانی قیمت پر فروخت کریں انہیں خطا کار اور ملعون قرار دیا ہے۔ آج ہم نے اسلامی شریعت کے برخلاف اپنی ذاتی پسندکے اعمال اپنائے ہوئے ہیں ، حلال پر حرام کو ترجیح دی ہے اور پسند یدہ کے بجائے قابلِ نفریں افعال میں مبتلا ہیں جب کہ شریعت ِ اسلامیہ ہمیں تمام ایسے اُمور سے منع اور روکتی ہے جن سے معاشرے میں بگاڑ پیدا ہو ، معیشت کا پہیہ جام ہو ، لوگوں کی مشکلات میں اضافہ ہو اور حرص و لالچ کو فروغ حاصل ہو ۔امام غزالی ؒ نے اپنی شہرہ آفاق کتاب ’’احیاء العلوم ‘‘ میں ایک بزرگ سے متعلق یہ واقعہ لکھا ہے۔’’ بزرگ نے گندم سے بھری کشتی بصرہ روانہ کی اور اپنے وکیل کو خط لکھا کہ یہ بصرہ پہنچتے ہی فروخت کر دینا ۔ اگلے دن تک مؤخر نہ کرنا۔ جس دن کشتی بصرہ پہنچی تو وہاں اتفاقاً بھاؤ بہت کم تھااور تاجروں نے وکیل کو دگنا نفع کمانے کے لئے جمعہ تک مؤخر کرنے کا مشورہ دیا۔ اُس نے ایسا ہی کیا اور کئی گنا نفع کمایا۔ بزرگ کو جب یہ معلوم ہوا تو اس نے وکیل کو خط لکھا کہ ہم اپنے دین کی سلامتی کے ساتھ تھوڑے نفع پر قناعت کرلیتے ہیں لیکن تم نے اس کے خلاف کام کیا لہٰذا خط ملتے ہی فوراً سارا مال بصرہ کے فقراء پر صدقہ کر دینا۔‘‘ اﷲ تعالیٰ ہمیں احتکار سے بچنے اور اپنے اسلاف کی اتنی عمدہ اور بہترین سوچ پر عمل کرنے کی توفیق عطا فرمائے۔ امین۔
     
    • زبردست زبردست × 1
  2. ایس ایس ساگر

    ایس ایس ساگر لائبریرین

    مراسلے:
    294
    جھنڈا:
    Pakistan
    موڈ:
    Cheerful
    موجودہ حالات کے تناظر میں ایک عمدہ تحریر۔
     
    • پسندیدہ پسندیدہ × 1
  3. فہد مقصود

    فہد مقصود محفلین

    مراسلے:
    318
    سوال
    حرام ذخیرہ اندوزی صرف کھانے پینے کی چیزوں میں ہو گی یا باقی چیزوں میں بھی ذخیرہ اندوزی حرام ہو سکتی ہے؟

    جواب کا متن

    الحمد للہ:

    ناجائز ذخیرہ اندوزی حرام ہے، اس کے حرام ہونے پر صحیح مسلم کی واضح روایت موجود ہے کہ

    جناب معمر بن عبد اللہ رضی اللہ عنہ کہتے ہیں کہ رسول اللہ صلی اللہ علیہ و سلم نے فرمایا: (ناجائز ذخیرہ اندوزی صرف گناہ گار ہی کرتا ہے)

    امام نووی رحمہ اللہ کہتے ہیں:

    "اہل لغت کا کہنا ہے کہ [حدیث میں مذکور عربی لفظ] " خاطئ " کا مطلب ہے کہ نافرمان اور گناہ گار، نیز یہ حدیث ناجائز ذخیرہ اندوزی کی حرمت کے سلسلے میں بالکل واضح ہے۔" ختم شد

    شریعت نے ناجائز ذخیرہ اندوزی کو حرام اس لیے قرار دیا ہے کہ اس سے لوگوں کو نقصان ہوتا ہے۔

    تاہم اہل علم کا اس بارے میں اختلاف ہے کہ ناجائز ذخیرہ اندوزی کس چیز میں ہوتی ہے؟ تو کچھ کہتے ہیں کہ یہ صرف غذائی اجناس میں ہوتی ہے۔

    جبکہ کچھ اہل علم کا کہنا ہے کہ یہ ہر اس چیز میں ہو سکتی ہے جس کی لوگوں کو ضرورت ہو، اور اس چیز کو روکنے سے انہیں تکلیف پہنچے، یہ مالکی فقہائے کرام اور امام احمد کا ایک موقف ہے، اور یہی صحیح موقف ہے؛ کیونکہ حدیث کے ظاہری الفاظ کے مطابق یہی موقف بنتا ہے۔

    اس بارے میں امام شوکانی رحمہ اللہ "نيل الأوطار" (5/262 ) میں لکھتے ہیں کہ:

    "احادیث کا ظاہری مفہوم یہ ہے کہ انسانوں یا جانوروں کی خوراک میں بلا تفریق ناجائز ذخیرہ اندوزی حرام ہے، لہذا جن چند روایات میں لفظ "طعام" یعنی کھانے کی اشیا کا ذکر ہے ان کی وجہ سے دیگر مطلق روایات کو مقید کرنا درست نہیں؛ کیونکہ یہ تو محض مطلق احادیث کے اطلاقات میں سے کسی ایک کی نصاً صراحت ہے۔" ختم شد

    اسی طرح شافعی فقیہ علامہ رملی رحمہ اللہ " حاشية أسنى المطالب "(2/39) میں لکھتے ہیں:

    "مناسب یہی ہے کہ ناجائز ذخیرہ اندوزی کا حکم ہر اس چیز پر ہونا چاہیے جس کی عام طور پر ضرورت ہو، چاہے اس کا تعلق ملبوسات سے ہو یا کھانے کی اشیا سے۔" ختم شد

    اور یہی موقف اس حکمت کے ساتھ مطابقت رکھتا ہے جس کی وجہ سے ناجائز ذخیرہ اندوزی منع کی گئی ہے، اور وہ ہے لوگوں کو نقصان پہنچانا، چنانچہ اس موقف کے مطابق دائمی فتوی کمیٹی نے فتوی جاری کیا، چنانچہ ان کے فتوی نمبر: (6374) میں ہے کہ:

    "جس چیز کی لوگوں کو ضرورت ہو اسے ذخیرہ کرنا جائز نہیں ہے؛ اسے "احتکار" کہا جاتا ہے؛ ممانعت کی دلیل رسول اللہ صلی اللہ علیہ و سلم کا فرمان ہے: (ناجائز ذخیرہ اندوزی صرف گناہ گار ہی کرتا ہے) اس حدیث کو امام احمد، مسلم، ابو داود، نسائی اور ابن ماجہ نے روایت کیا ہے۔
    ناجائز ذخیرہ اندوزی کے حرام ہونے کی وجہ یہ ہے کہ اس سے مسلمانوں کو نقصان پہنچتا ہے۔
    لہذا اگر کوئی چیز لوگوں کے لیے وافر موجود ہو تو اس کو ذخیرہ کرنا جائز ہے، چنانچہ جیسے ہی انہیں ضرورت پڑے تو انہیں وہ چیز مہیا کر دی جائے، اور لوگوں کو کسی قسم کا حرج اور تکلیف بھی محسوس نہ ہو" ختم شد
    "فتاوى اللجنة الدائمة" (13/184)

    واللہ اعلم

    ماخذ: الاسلام سوال و جواب
     
    • زبردست زبردست × 1
  4. فہد مقصود

    فہد مقصود محفلین

    مراسلے:
    318
    صحيح البخاري - مولانا محمد داؤد راز رحمہ اللہ - جلد 3

    54- بَابُ مَا يُذْكَرُ فِي بَيْعِ الطَّعَامِ وَالْحُكْرَةِ:

    باب: اناج کا بیچنا اور احتکار کرنا کیسا ہے ؟

    حدیث نمبر: 2131
    حَدَّثَنَا إِسْحَاقُ بْنُ إِبْرَاهِيمَ ، ‏‏‏‏‏‏أَخْبَرَنَا الْوَلِيدُ بْنُ مُسْلِمٍ ، ‏‏‏‏‏‏عَنِ الْأَوْزَاعِيِّ ، ‏‏‏‏‏‏عَنِ الزُّهْرِيِّ ، ‏‏‏‏‏‏عَنْ سَالِمٍ ، ‏‏‏‏‏‏عَنْ أَبِيهِ رَضِيَ اللَّهُ عَنْهُ، ‏‏‏‏‏‏قَالَ:‏‏‏‏ "رَأَيْتُ الَّذِينَ يَشْتَرُونَ الطَّعَامَ مُجَازَفَةً، ‏‏‏‏‏‏يُضْرَبُونَ عَلَى عَهْدِ رَسُولِ اللَّهِ صَلَّى اللَّهُ عَلَيْهِ وَسَلَّمَ أَنْ يَبِيعُوهُ، ‏‏‏‏‏‏حَتَّى يُؤْوُوهُ إِلَى رِحَالِهِمْ".
    ہم سے اسحاق بن ابراہیم نے بیان کیا، کہا کہ ہم کو ولید بن مسلم نے خبر دی، انہیں اوزاعی نے، انہیں زہری نے، انہیں سالم نے، اور ان سے ان کے باپ نے بیان کیا، کہ میں نے رسول اللہ صلی اللہ علیہ وسلم کے زمانے میں ان لوگوں کو دیکھا جو اناج کے ڈھیر (بغیر تولے ہوئے محض اندازہ کر کے) خرید لیتے ان کو مار پڑتی تھی۔ اس لیے کہ جب تک اپنے گھر نہ لے جائیں نہ بیچیں۔
     
    آخری تدوین: ‏جولائی 22, 2020
    • زبردست زبردست × 1
  5. نکتہ ور

    نکتہ ور محفلین

    مراسلے:
    699
    جھنڈا:
    Pakistan
    موڈ:
    Cheerful
    بیچیں
     
    • پسندیدہ پسندیدہ × 1

اس صفحے کی تشہیر