میر آہِ سحر نے سوزشِ دل کو مٹا دیا

[حسان خان]

آہِ سحر نے سوزشِ دل کو مٹا دیا​

اِس باد نے ہمیں تو دیا سا بجھا دیا​

​

سمجھی نہ بادِ صبح کہ آ کر اٹھا دیا​

اُس فتنۂ زمانہ کو ناحق اٹھا دیا​

​

پوشیدہ رازِ عشق چلا جائے تھا سو آج​

بے طاقتی نے دل کی وہ پردہ اٹھا دیا​

​

اِس موج خیز دہر میں ہم کو قضا نے آہ​

پانی کے بلبلے کی طرح سے مٹا دیا​

​

تھی لاگ اُس کی تیغ کو ہم سے سو عشق نے​

دونوں کو معرکے میں گلے سے ملا دیا​

​

سب شورِ ما و من کو لیے سر میں مر گئے​

یاروں کو اِس فسانے نے آخر سلا دیا​

​

آوارگانِ عشق کا پوچھا جو میں نشاں​

مشتِ غبار لے کے صبا نے اڑا دیا​

​

اجزا بدن کے جتنے تھے پانی ہو بہہ گئے​

آخر گدازِ عشق نے ہم کو بہا دیا​

​

کیا کچھ نہ تھا ازل میں نہ طالع جو تھے درست​

ہم کو دلِ شکستہ قضا نے دلا دیا​

​

گویا محاسبہ مجھے دینا تھا عشق کا​

اِس طَور دل سی چیز کو میں نے لگا دیا​

​

مدت رہے گی یاد ترے چہرے کی جھلک​

جلوے کو جس نے ماہ کے جی سے بھلا دیا​

​

تکلیف دردِ دل کی عبث ہمنشیں نے لی​

دردِ سخن نے میرے سبھوں کو رلا دیا​

​

اُن نے تو تیغ کھینچی تھی پر جی چلا کے میر​

ہم نے بھی ایک دم میں تماشا دکھا دیا​

​

(میر تقی میر)​

 

[طارق شاہ]

پوشیدہ رازِ عشق چلا جائے تھا، سو آج​

بے طاقتی نے دل کی، وہ پردہ اٹھا دیا​

تھی لاگ اُس کی تیغ کو ہم سے، سوعشق نے​

دونوں کو معرکے میں گلے سے ملا دیا​

​

مدت رہے گی یاد ترے چہرے کی جھلک!​

جلوے کو جس نے ماہ کے، جی سے بھلا دیا​

کیا کہنے صاحب!​

بہت عمدہ انتخاب پر ڈھیر ساری داد قبول کیجئے​

تشکّر​

بہت خوش رہیں​

 

[حسان خان]

پسندیدگی کے لیے شکریہ طارق شاہ صاحب۔

 

[احمد بلال]

واہ ۔ بہت زبردست۔ بہت اعلیٰ۔ کیا شاندار کلام ہے۔ ہر شعر کمال کا ۔ ہر لفظ تعریف کے لائق۔
اگر دس بار بھی ریٹنگ کی آپشن ملتی تو میں اسے دس بار ہی زبردست ریٹنگ کرتا۔

 

[مزمل شیخ بسمل]

بہت عمدہ کلام۔ خوش رہیں۔