بگٹی خواتین قتل کا مقصد براہمداغ کو سبق سکھانا تھا؟
Published on 06. Feb, 2012
کراچی ( ٹاپ سٹوری آن لائن ) باغی بلوچ رہنماء براہمداغ بگٹی کی بہن اور بھانجی کے کراچی میں ہونے والے قتل کی اب تک ہونے والی تفتیش میں جو بات سامنے آ رہی ہے اس کے مطابق بگٹی خواتین کو اس بہیمانہ طریقے سے مارنے کا مقصد بظاہر صرف براہمداغ کو سبق سکھانا تھا۔ بتیس سالہ جھمر، ان کی تیرہ سالہ بیٹی جانہ اور ڈرائیور کو اکتیس جنوری کی رات نامعلوم افراد نے AK-47 آٹومیٹک رائفل سے فائرنگ کر کے ہلاک کر دیا تھا۔ یہ رائفل پاکستان کی واہ آرڈننیس فیکٹری میں تیار کی جاتی ہے اور گوریلا کارروائیوں میں استعمال کی جاتی ہے۔
تہرے قتل کی اس واردات کی عجیب بات یہ تھی کہ حملہ آوروں نے مقتولہ جھمر کی ملازمہ کو زندہ چھوڑ دیا تھا جو اب اس واقعہ کی واحد چشم دید گواہ ہے۔ پولیس ذرائع کے مطابق ایسا غالباً اس لیے کیا گیا تاکہ قاتلوں کا پیغام اپنے ہدف تک بغیر کسی شک و شبہ کے پہنچے کہ ان خواتین کو کیوں نشانہ بنایا گیا، کیونکہ اگر ملازمہ کو بھی مار دیا جاتا تو یہ واردات کراچی میں جاری ’ٹارگٹ کلنگ‘ کا تسلسل سمجھا جانا تھاجس میں خوف و ہراس پھیلانے کے لیے عام آدمیوں کو دہشت کا نشانہ بنایا جاتا ہے۔
